काठमाडौं । नेपाली कांग्रेसका सांसद गंगा अवालले भक्तपुरमा ख्वप विश्वविद्यालय सञ्चालनका लागि सरकारसँग तत्काल अनुमति दिन माग गर्नुभएको छ। वर्षौंदेखि स्थानीय जनता विश्वविद्यालय सञ्चालनको प्रतीक्षामा रहेको उल्लेख गर्दै उहाँले यस विषयमा ढिलाइ नगर्न सरकारको ध्यानाकर्षण गराउनुभएको हो।
सांसद अवालले प्रतिनिधि सभामा सभामुखमार्फत सरकारलाई निवेदन प्रस्तुत गर्दै आवश्यक प्रक्रिया चाँडो पूरा गरी अनुमति दिन आग्रह गर्नुभएको छ। उहाँका अनुसार ख्वप विश्वविद्यालय सञ्चालनले भक्तपुरमा उच्च शिक्षाको पहुँच विस्तार हुनुका साथै शैक्षिक विकासमा महत्वपूर्ण योगदान पुग्ने अपेक्षा गरिएको छ।
भक्तपुरका सर्वसाधारण तथा सरोकारवालाहरू लामो समयदेखि विश्वविद्यालय सञ्चालनको पक्षमा रहेकाले उनीहरूको अपेक्षा सम्बोधन गर्नु सरकारको दायित्व भएको सांसद अवालले बताउनुभयो। साथै, शिक्षा क्षेत्रको समग्र विकासका लागि पनि यस निर्णयले सकारात्मक प्रभाव पार्ने विश्वास व्यक्त गरिएको छ।
