काठमाडौं । माननीय रुकेश रंजित र स्वास्थ्य तथा जनसङ्ख्या तथा खानेपानी मन्त्री निशा मेहताबीच आज मन्त्रालयमा महत्वपूर्ण भेटघाट तथा छलफल सम्पन्न भएको छ। भेटमा विशेषगरी भक्तपुर जिल्लाका स्वास्थ्य र खानेपानीसँग सम्बन्धित बहुप्रतीक्षित योजनाहरूको विषयमा केन्द्रित छलफल भएको जनाइएको छ।
छलफलका क्रममा नगरकोट मुहानपोखरीस्थित महादेव खोला जलाशय खानेपानी आयोजना प्राथमिकतामा परेको थियो। उक्त आयोजनाले स्थानीय स्तरमा देखिएको खानेपानी अभाव समाधानमा महत्वपूर्ण भूमिका खेल्ने अपेक्षा गरिएको छ। यसका साथै भक्तपुरको दुवाकोट क्षेत्रमा निर्माण गर्ने भनिएको विस्तारित वीर अस्पतालको विषय पनि प्रमुख रूपमा उठाइएको थियो।
त्यसैगरी, शहिद धर्मभक्त मानव अंग प्रत्यारोपण केन्द्र, भक्तपुर क्यान्सर अस्पताल र भक्तपुर अस्पताललाई थप व्यवस्थित र प्रभावकारी बनाउने विषयमा पनि छलफल भएको छ। तीनै संस्थालाई एकीकृत गर्दै स्वास्थ्य विज्ञान प्रतिष्ठानका रूपमा विकास गर्ने प्रस्तावसमेत प्रस्तुत गरिएको थियो, जसले दीर्घकालीन रूपमा स्वास्थ्य सेवा सुधारमा योगदान पुर्याउने विश्वास गरिएको छ।
मन्त्री निशा मेहताले महादेव खोला जलाशय खानेपानी आयोजनाको अध्ययन तत्काल सुरु गरिने स्पष्ट पारिन्। साथै बजेटको चापका कारण आगामी आर्थिक वर्षमा नयाँ योजना थप्न कठिन हुने भए पनि पुराना तथा अपुरा योजनालाई प्राथमिकतामा राख्दै अघि बढाइने जानकारी दिइन्।
उनले विस्तारित वीर अस्पताल निर्माणका सन्दर्भमा समयसीमा र विस्तृत प्रतिवेदन तयार गरी कार्य अगाडि बढाउने योजना बनाइने बताइन्। अन्य प्रस्तावित विषयहरूमा समेत आवश्यक अध्ययनपछि चरणबद्ध रूपमा कार्यान्वयन अघि बढाइने उनको भनाइ रहेको छ।
