काठमाडौँ । शिक्षा मन्त्रालयले एउटै विद्यालयमा अध्ययनरत विद्यार्थीसँग एकपटक मात्र भर्ना शुल्क लिनुपर्ने स्पष्ट निर्देशन जारी गरेको छ । मन्त्रालयले देशभरका विद्यालयहरूलाई एउटै शैक्षिक सत्रमा पटक–पटक भर्ना शुल्क नलिन र शैक्षिक सत्र सुरु हुनुअघि कुनै पनि विद्यार्थी भर्ना नगर्न सचेत गराएको हो ।
मन्त्रालयका उपसचिव कृष्णचन्द्र पोख्रेलद्वारा हस्ताक्षरित पत्रमार्फत संघीय मामिला तथा सामान्य प्रशासन मन्त्रालयलाई जानकारी गराउँदै देशभरका ७५३ वटै स्थानीय तहलाई यस निर्देशनको प्रभावकारी कार्यान्वयन र अनुगमन गर्न अनुरोध गरिएको छ । पछिल्लो समय केही विद्यालयहरूले शैक्षिक सत्र सुरु हुनुअघि नै विद्यार्थी भर्ना गर्ने, अग्रिम शुल्क असुल गर्ने तथा स्वीकृत शीर्षकभन्दा बाहिर गएर अत्यधिक शुल्क लिने गुनासो बढेपछि मन्त्रालयले कडाइका साथ यस्तो निर्णय लिएको हो ।
जारी पत्रमा शिक्षा नियमावली २०५९को परिच्छेद १५ उद्धृत गर्दै शैक्षिक सत्र सुरु नभई कसैले पनि विद्यार्थी भर्ना गर्न नपाउने कानुनी व्यवस्था पुनः स्मरण गराइएको छ । ‘प्रचलित कानुनअनुसार भर्ना भएपश्चात मात्र स्वीकृत शीर्षकमा शुल्क लिन पाइने व्यवस्था हुँदाहुँदै पनि केही विद्यालयहरूले अग्रिम तथा बढी शुल्क असुल्ने, फरक शीर्षकमा रकम लिने र कक्षा परिवर्तनका नाममा पुनः भर्ना शुल्क लिने गरेको पाइएको छ,’ पत्रमा उल्लेख गरिएको छ ।
यसैगरी, सर्वोच्च अदालतको फैसला समेतलाई आधार मान्दै मन्त्रालयले नियमविपरीत उठाइएको अग्रिम तथा अतिरिक्त शुल्क तत्काल सम्बन्धित अभिभावक वा विद्यार्थीलाई फिर्ता गर्न निर्देशन दिएको छ । यदि कुनै विद्यालयले यस निर्देशनको उल्लंघन गरेमा प्रचलित कानुनअनुसार कडा कारबाही गरिने र त्यसका लागि स्थानीय तहलाई आवश्यक अधिकार प्रत्यायोजन गरिएको मन्त्रालयले जनाएको छ ।
