काठमाडौं । प्रतिनिधिसभाको उपसभामुख पदका लागि श्रम संस्कृति पार्टीले औपचारिक रूपमा दाबी प्रस्तुत गरेको छ। पार्टी अध्यक्ष हर्क साम्पाङले सामाजिक सञ्जालमार्फत आफ्नो दलले उपसभामुखमा महिला उम्मेदवार खडा गर्ने घोषणा गरेका हुन्। सभामुख निर्विरोध चयन भइसकेपछि अब उपसभामुखको निर्वाचनतर्फ ध्यान केन्द्रित भएको उनको भनाइ छ।
साम्पाङले आफ्नो स्टाटसमार्फत सभामुख चयनप्रति बधाई व्यक्त गर्दै अब उपसभामुख पदमा प्रतिस्पर्धा हुने उल्लेख गरेका छन्। उनले ‘हामी महिला उम्मेदवार खडा गर्दैछौँ’ भन्दै आफ्नो पार्टीले लैङ्गिक समावेशितालाई प्राथमिकतामा राखेको संकेत दिएका छन्। यस कदमलाई साना दलको सक्रियता र नयाँ राजनीतिक अभ्यासका रूपमा हेरिएको छ।
यसैबीच, उनले राष्ट्रिय स्वतन्त्र पार्टी (रास्वपा)ले आफ्नो उम्मेदवारलाई समर्थन गर्ने विश्वास पनि व्यक्त गरेका छन्। ‘नयाँले नयाँलाई भोट हाल्छ कि पुरानालाई?’ भन्ने प्रश्न उठाउँदै उनले सम्भावित मत परिणामबारे समेत संकेत गरेका छन्। साम्पाङको यस अभिव्यक्तिले उपसभामुख चयनको निर्वाचन थप रोचक बन्ने देखिएको छ।
