दिपेश श्रेष्ठ, काठमाडौं — प्रतिनिधि सभाको आजको बैठकमा सांसद हर्क साम्पाङले प्रस्तुत गरेको शैली र धारणा चर्चाको केन्द्र बनेको छ। उनलाई “लगामबिनाको घोडा” भन्दै आलोचना गर्नेहरूलाई आजको बैठकले व्यवहारिक जवाफ दिएको देखिएको छ। बैठकमा उनले जनप्रतिनिधिहरू अझ अनुशासित हुनुपर्ने आवश्यकता औंल्याउँदै समयको महत्त्वबारे स्पष्ट रूपमा ध्यानाकर्षण गराएका थिए।
बैठकका क्रममा विभिन्न सांसदहरूले आ–आफ्नो धारणा राखे पनि हर्क साम्पाङको प्रस्तुति विशेष रूपमा फरक देखिएको थियो। उनले पार्टीगत सीमाभन्दा माथि उठेर राष्ट्रिय हितका विषयमा स्पष्ट र दृढ आवाज उठाउँदै सिमाना सुरक्षाको विषय, एमसीसी खारेजीको प्रस्ताव, भूमिहीन सुकुम्बासीका समस्या तथा गरिब किसान र मजदुरहरूको पक्षमा आफ्नो धारणा राखेका थिए।
उनको स्पष्टवादिता र निर्भीक अभिव्यक्तिले संसदमा एक प्रकारको सशक्त सन्देश दिएको विश्लेषण गरिएको छ। नेतृत्व भनेको जनताको पक्षमा उभिने, स्पष्ट र जिम्मेवार हुने हुनुपर्ने उदाहरणका रूपमा साम्पाङको प्रस्तुति प्रस्तुत गरिएको छ। यसले संसदभित्रको बहसलाई अझ सशक्त बनाएको अनुभूति गरिएको छ।
तर अर्कोतर्फ, उनको विचार र अभिव्यक्तिलाई लिएर आलोचना र ट्रोल गर्ने प्रवृत्ति पनि कायम रहेको देखिन्छ। केही समूहले उनको शैलीमाथि प्रश्न उठाउँदै आएका छन् भने समर्थकहरूले भने यस्तो आलोचनाभन्दा पनि उनको सोच, विचार र आचरणलाई आत्मसात् गर्नुपर्ने आवश्यकता औंल्याएका छन्।
