काठमाडौं। गृहमन्त्री सुधन गुरुङले सर्वसाधारणका गुनासा प्रत्यक्ष रूपमा सुन्ने उद्देश्यसहित मन्त्रालयमै नागरिकलाई बोलाएर समस्या सुन्ने पहल गरेका छन्। उक्त कार्यक्रममा विशेषगरी विभिन्न गाउँ–गाउँबाट आएका नागरिकहरूले आफ्ना पीडा, अन्यायका अनुभव र राज्य सेवाप्रति देखिएका समस्या गृहमन्त्रीसमक्ष राखेका थिए।
गुनासा राख्ने क्रममा अधिकांश सहभागीहरूले नेपालमा अझै पनि न्याय पाउन सहज नभएको गुनासो गरेका छन्। उनीहरूले शक्ति र पहुँचको भरमा अन्याय सहनुपर्ने अवस्था विद्यमान रहेको उल्लेख गर्दै सरकारको गम्भीर ध्यानाकर्षण गराएका थिए।
कार्यक्रममा सहभागी एक सर्वसाधारणले विगतका अनुभव सुनाउँदै भने, “धेरै गृहमन्त्रीहरू आए, तर तपाईंजस्तो हाम्रो कुरा प्रत्यक्ष सुन्ने व्यक्ति पाउन सकेनौं। हामीजस्ता सामान्य नागरिकको आवाज सुन्नुभएकोमा धन्यवाद।”
नागरिकसँगको प्रत्यक्ष संवादपछि गृहमन्त्री गुरुङले उठेका गुनासालाई गम्भीरतापूर्वक लिँदै आवश्यक पहल गर्ने प्रतिबद्धता जनाएका छन्। उनले राज्यको सेवा सबै नागरिकसम्म समान रूपमा पुग्ने वातावरण निर्माण गर्ने र अन्यायमा परेकालाई न्याय दिलाउनेतर्फ आफू दृढ रहेको बताए।
