दिपेश श्रेष्ठ,काठमाडौं । काठमाडौंस्थित Airport Hotel मा आयोजित एक भव्य समारोहबीच सानिमा बैंकका पूर्व सञ्चालक तथा हाल सानिमा सेक्युरिटीजका अध्यक्ष भारतबहादुर थापा ‘प्रतिक्षित’ द्वारा लिखित कृति “माटोको सुगन्ध” को लोकार्पण सम्पन्न भएको छ।
साहित्यप्रेमी, बुद्धिजीवी, बैंकिङ क्षेत्रका प्रतिनिधि तथा विभिन्न क्षेत्रका विशिष्ट व्यक्तित्वहरूको उल्लेखनीय उपस्थिति रहेको उक्त कार्यक्रमले कृतिप्रति उत्साहजनक चासो देखाएको थियो।
कार्यक्रममा वक्ताहरूले लेखक थापाको बहुआयामिक व्यक्तित्व र उनको साहित्यिक योगदानको प्रशंसा गर्दै “माटोको सुगन्ध” ले नेपाली समाज, संस्कार र भूमिसँगको आत्मीय सम्बन्धलाई उजागर गरेको बताए। उनीहरूले कृतिले पाठकलाई आफ्नै माटो, पहिचान र संस्कृतिसँग जोड्ने महत्वपूर्ण सन्देश दिएको धारणा व्यक्त गरे।
लोकार्पण समारोहमा लेखक थापाले आफ्नो लेखन यात्राबारे प्रकाश पार्दै पुस्तकले जीवनका भोगाइ, अनुभव र समाजप्रतिको दृष्टिकोणलाई समेटेको उल्लेख गरे। उनले आगामी दिनमा पनि साहित्य सिर्जनालाई निरन्तरता दिने प्रतिबद्धता व्यक्त गर्दै उपस्थित सम्पूर्णलाई धन्यवाद ज्ञापन गरेका थिए।
