देश तपाईहरूको राजनैतिक मुद्दा भन्दा धेरै माथीको कुरा हो : रक्षा बम

काठमाडौँ । जेनजी अगुवा रक्षा बमले नेकपा एमाले र तिनका कार्यकर्तालाई सडकमा जारी विध्वंसात्मक आन्दोलन रोकी जिम्मेवार र लोकतान्त्रिक चरित्र अपनाउन आग्रह गरेकी छिन् ।

बमले आफ्नो सन्देशमा मुलुकमा केही हदसम्म स्थिरता आएको अनुभूति भइरहेकाले अब थप विध्वंस दोहोरिन नहुनेमा जोड दिएकी छन् । उनले भदौ २३ र २४ गते देखिएको विध्वंसको स्मरण गराउँदै देशलाई सास फेर्ने समय दिन आग्रह गरेकी छन् । ‘देश तपाईहरूको राजनैतिक मुद्दा भन्दा धेरै माथीको कुरा हो,’ उनले लेखेकी छिन् ।

यदि एमालेलाई वर्तमान प्रक्रिया प्रतिशोध जस्तो लागेको भए कानुनी बाटो रोज्न र कानुनी लडाइँ लड्न उनले सुझाएकी छन् । लोकतन्त्रमा सत्य प्रमाणित गर्ने ठाउँ अदालत र प्रक्रिया भएको उनको भनाइ छ । बमले सरकारसँग असहमति राख्ने एमालेको अधिकारको पक्षमा आफू पनि उभिने तर थप अराजकता, विध्वंस र द्वन्द्वले देशको आयु नै कमजोर बनाउने चेतावनी दिएकी छन् ।

समाजमा एमालेको आवश्यकता रहेको औंल्याउँदै बमले जिम्मेवार, उत्तरदायी र लोकतान्त्रिक चरित्र बोकेको एमाले चाहिएको बताएकी छन् । उनले शान्तिपूर्ण प्रदर्शन गर्न पाइने भए पनि बाटो हिँडिरहेका सर्वसाधारणमाथि आक्रमण गर्ने, आम जनतालाई असर पर्ने गरी सडक अवरोध गर्ने, निर्दोषहरूको सवारी साधन जलाउने जस्ता गतिविधिले एमालेलाई बलियो नबनाउने बरु नैतिक आधार कमजोर बनाउने उल्लेख गरेकी छन् ।