भक्तपुर । कांग्रेसकाे तर्फबाट प्रतिनिधि सभा सदस्यकाे उमेदवार रहेका अधिवक्ता किरण न्याैपानेले फागुन २१ गते भएको निर्वाचनमा ९,२६,१०० रुपैयाँ खर्च भएको विवरण निर्वाचन आयोगलाई बुझाएका छन्।
भक्तपुर निर्वाचन क्षेत्र नं. १ बाट उम्मेदवार बनेका न्याैपानेले मंगलबार निर्वाचन आयोगमा चुनावमा भएको खर्च विवरण बुझाएका हुन्। न्याैपानेले बुझाएको खर्च विवरणमा सबभन्दा बढी सवारी भाडामा २ लाख १० हजार,प्रचार प्रसार सामग्री छपाईमा १ लाख ८५ हजार खर्च भएको उल्लेख छ।
त्यस्तै, फाेटाे भिडियाे तथा विद्युतीय प्रचारप्रसारमा १ लाख १५ हजार, कार्यालय सञ्चालनमा १ लाख , खाजा,पानी र इन्टरनेट लगाएतमा १ लाख ५० हजार खुलाएकाे छ भने,विविधमा अन्य खर्च भएको उल्लेख छ। त्यस्तै, नमुना मतपत्र,प्रचार सामग्री,शुभ चिन्तकहरुबाट सहयाेग भएकाे खुलाएका छन् भने,घरदैलो र बुथमा बस्ने प्रतिनिधिहरुकाे खर्च सम्बन्धित ईकाइका साथिहरुले ब्यवस्थापन गरेकाे जनाएका छन्।
आयोगले प्रत्यक्षतर्फका १६५ वटा निर्वाचन क्षेत्रलाई भौगोलिक अवस्था, पहुँच, सुविधा र सेवा नेटवर्क मूल्याङ्कनका आधारमा पाँच वर्गमा विभाजन गरी २५ लाख देखि ३३ लाख रुपैयाँ सम्मको खर्च निर्धारण गरिदिएको थियो। जसअनुसार भक्तपुरका दुई वटै निर्वाचन क्षेत्रका उम्मेदवारहरूले २९ लाख रुपैयाँको सीमाभित्र रहेर खर्च गर्न पाउने गरी आयोगले खर्च निर्धारण गरिदिएको थियो। जिल्ला निर्वाचन कार्यालय भक्तपुरले सूचना जारी गर्दै निर्वाचनको मत परिणाम सार्वजनिक भएको ३० दिन भित्रमा आफ्नो चुनावी खर्च विवरण पेस गर्न सबै उम्मेदवारहरूलाई आग्रह गरेको छ।
