विश्व नेपाली साहित्य महासङ्घ नेपाल शाखा नेपालगन्जको आयोजनामा आख्यानकार छवि वैरागी घिमिरेद्वारा लिखित विविशारा उपन्यासको विमर्श तथा संघको नेपाल शाखा मातहतका विभिन्न शाखाहरूको पुनर्गठन सम्पन्न भएको छ।
विश्व नेपाली साहित्य महासङ्घ नेपाल शाखाका उपाध्यक्ष ऋषिराम सापकोटाको सभापतित्व एवं विश्व नेपाली साहित्य महासङ्घ नेपाल शाखाका सल्लाहकार प्राडा कृष्णप्रसाद घिमिरेज्यूको प्रमुख आतिथ्यमा दुई चरणमा सम्पन्न भएको उक्त कार्यक्रमको पहिलो चरणमा लुम्बिनी प्रदेशमा रहेर साहित्य सेवामा समर्पित प्राज्ञ महानन्द ढकाललाई सम्मान गरिनुका साथै विनेसाम लुम्बिनी प्रदेशलाई उचाइ प्रदान गर्नुहुने प्रदेशका अध्यक्ष लेकप्रसाद प्याकुरेललाई कदरपत्र प्रदान गरिएको थियो। विश्व नेपाली साहित्य महासङ्घ नेपाल शाखाका सचिव प्याकुरेलको सहजीकरणमा सञ्चालित उक्त कार्यक्रममा छवि वैरागी घिमिरेद्वारा लिखित विविशारा उपन्यासको परिचर्चा गरिएको थियो। परिचर्चाका क्रममा समीक्षक चरित्रा शाहले फ्रायड,एडलर र युङको मनोवैज्ञानिक अवधारणाअनुसार विविशारा कृतिको चिरफार गर्नु भएको थियो।
अर्का समीक्षक पुष्कर रिजालले कृतिमा समेटिएको सामाजिक विसङ्गति पक्ष र संरचनात्मक कोणबाट समीक्षा गरेका थिए। दुवै समीक्षकले उपन्यास विविशारा हरेक वर्गका लागि पठनयोग्य रहेको बताए। सोही क्रममा उपन्यासकार छवि वैरागी घिमिरेले उपन्यासलाई यथार्थपरक बनाउनका लागि गरिएका अभ्यासहरू र उपन्यास लेख्दाका अनुभवहरू सहित समीक्षकहरूले उठाएका विषयवस्तु माथि प्रष्ट पार्ने मन्तव्य प्रस्तुत गरेका थिए।
कार्यक्रमको दोस्रो चरणमा विश्व नेपाली साहित्य महासङ्घ मातहतका लुम्बिनी प्रदेश, बाँके र बर्दिया जिल्ला शाखा गठन गरिएको थियो । चरित्रा शाहको अध्यक्षतामा गठित लुम्बिनी शाखाअन्तर्गत उपाध्यक्षद्वय भरतबहादुर रानाभाट र गणेशा कार्की, महासचिव बोधराज प्याकुरेल सचिव इन्दिरा गौतम, कोषाध्यक्ष सुन्दर गुरुङ सदस्यहरू केशव गाह पाल्पा, लक्ष्मी बस्याल बर्दिया, खगेन्द्र नेपाल बर्दिया, दर्पण दंगाली दाङ, यमा रेग्मी दाङ, नवीन बस्याल प्युठान, शशिधर सापकोटा कपिलवस्तु, दिला शाह बाँके, तारा रोकाया बाँके, पवन जयस्वाल बाँके, प्रतिमा पन्थी रूपन्देही रहेका छन् । त्यसैगरी साहित्यकार चन्द्रावती अधिकारीको अध्यक्षतामा गठित बाँके शाखाअन्तर्गत उपाध्यक्ष पद्मा रिजाल,सचिव महेन्द्र सेडाई,सहसचिव दीप पन्थी, कोषाध्यक्ष अर्चना पाठक र सदस्यहरूमा सुनगाभा पोखरेल,सन्तोषी पुन मगर, लक्ष्मण सुर्खेती, मुस्तफा अहसन कुरैसी र अन्तरिक्ष देवकोटा रहेका छन्। सोही क्रममा फागुन ५ गते सम्पन्न अधिवेशनबाट प्रभात सुवेदीको अध्यक्षतामा गठित ११ सदस्य बर्दिया शाखा समेत घोषणा गरिएको थियो। कार्यक्रममा विश्व नेपाली साहित्य महासङ्घकी केन्द्रीय सचिव तथा संगठन विभाग प्रमुख कल्पना पौडेल जिज्ञासुले चयन भएका सम्पूर्ण पदाधिकारी तथा सदस्यहरूलाई बधाई सहित विश्व नेपाली साहित्य महासङ्घले गर्दै आएका अनुवाद र प्रकाशन सम्बन्धी विविध कार्यहरू माथि प्रकाश पारेकी थिइन्।
नेपाल प्रज्ञा प्रतिष्ठानका पूर्व सदस्य सचिव सनत रेग्मी, प्राज्ञ महानन्द ढकाल, प्रलेस केन्द्रीय सचिव हरिप्रसाद तिमिल्सिना, लेखक नरेन्द्र जंग पिटर, साहित्यकार किरण आचार्य लगायत चार दर्जन बढी साहित्यिक अभियन्ताहरूको उपस्थितिमा सम्पन्न उक्त कार्यक्रमका प्रमुख अतिथि प्राध्यापक डाक्टर कृष्णप्रसाद घिमिरेले विश्व नेपाली साहित्य महासंघले विगतदेखि वर्तमानसम्म गरेका गतिविधिहरूको चर्चा गर्नुका साथै चर्चित उपन्यासमाथि समेत संक्षिप्त प्रकाश पारेका थिए।
