सुनसरी । कवि विष्णु वियोगीको कवितासङ्ग्रह ‘किरिच’ माथिको धरानमा विमर्श कार्यक्रम सम्पन्न भएको छ । महेन्द्र बहुमुखी क्याम्पस, धरानको नेपाली विभागको आयोजनामा उक्त विमर्श सम्पन्न भएको हो ।
प्रा.डा. टङ्कप्रसाद न्यौपाने प्रमुख अतिथि रहेको उक्त कार्यक्रममा प्राज्ञ प्रा.डा.खेमराज खनाल, प्रा.डा गोपालप्रसाद भण्डारी, प्रा.डा. खेमनाथ दाहाल, प्रा.डा. भीम खतिवडा, प्रा.डा. सागरमणि सुवेदी, पिण्डेश्वर विद्यापीठका प्राचार्य काशी पौडेल, कोसी साहित्य–कला परिषद् नेपालका अध्यक्ष केशु विरही, ‘किरिच’ का लेखक विष्णु वियोगीलगायतका व्यक्तित्वहरूको उपस्थिति रहेको थियो । उक्त कार्यक्रममा साहित्यका अतिरिक्त प्राज्ञिक तथा बौद्धिक व्यक्तित्वहरूको बाक्लो उपस्थिति रहेको थियो । साथै महेन्द्र बहुमुखी क्याम्पस, धरानका विभिन्न तहका विद्यार्थीहरूको बाक्लो उपस्थितिले कार्यक्रमको शोभा बढाएको थियो ।
कृतिमाथि प्रा.डा. भीम खतिवडा र डा. सुभाषचन्द्र न्यौपानेले ‘किरिच’ माथिको विमर्श प्रस्तुत गरेका थिए । प्रा.डा. खतिवडाले पुस्तकको रचनागर्भका बारेका कुरा गर्दै निकै मेहनतका कारणले मात्र यो कृति बाहिर आएको बताए । नेपाल संस्कृत विश्वविद्यालयको पूर्व शिक्षाध्यक्षसमेत रहेका खतिवडाले यस कृतिभित्रका रचनाहरूले सिङ्गो समाजको प्रतिनिधित्व गरेको बताए । उता विमर्शक न्यौपानेले भने ‘किरिच’ लाई प्रयोगवादी कृतिका रूपमा चर्चा गरे ।
कार्यक्रममा निरोज आचार्य, प्रेसिका निरौला, नवराज पोखरेल ‘नवशिला’, दीपेन्द्रसिंह दर्नालले कृतिभित्रका रचना वाचन गरेका थिए ।
वियोगी पेसाले शिक्षक हुन् । २०५३ सालमै तयार भए पनि यो कृति २०८० सालमा मात्र प्रकाशनमा आएको हो ।
उपप्राध्यापक लक्ष्मीकुमार श्रेष्ठले शब्दले स्वागत गरेको उक्त कार्यक्रममा नेपाली विभागका विभागीय प्रमुख डा. दीपकप्रसाद न्यौपानेको अध्यक्षता रहेको थियो । कार्यक्रमको सञ्चालन भने उपप्राध्यापक राजेशकुमार यादवको रहेको थियो ।
