कृष्ण कुँवर- अबुधावी। नेपाली नवजागृति मण्डली, अबुधाबीले ख्रीष्टमस २०२५ को अवसरमा दोस्रो दिन पनि विविध धार्मिक कार्यक्रमसहित उत्सव मनायो। २० डिसेम्बर शनिबारबाट सुरु भएको ख्रीष्टमस उत्सव आज डिसेम्बर २१, आइतबार पनि निरन्तर रूपमा आयोजना गरिएको हो।
अबुधाबीस्थित मुसाफाको वर्कर भेलेज नजिकै रहेको ब्रेदेन चर्चमा अवस्थित नेपाली नवजागृति मण्डलीले सु–समाचारका विभिन्न कार्यक्रमहरू सञ्चालन गर्दै ख्रीष्टमस उत्सव मनाएको हो।
कार्यक्रममा येशूख्रीष्ट विश्वासीहरूका उद्धारकर्ता हुनुहुन्छ भन्ने सन्देश प्रस्तुत गर्दै परमेश्वरले मानवजातिप्रति गर्नुभएको प्रेम र उहाँको अनन्त उद्धारको सु–समाचार सबै विश्वासीहरूले संसारभर सबै मानिसहरुलाई सुनाउनुपर्ने कुरामा जोड दिईएको थियो।
वचनको क्रममा पास्टर गोपाल पुलामीले संसारले केवल क्षणिक शान्ति दिन सक्ने तर अनन्त उद्धार दिन नसक्ने स्पष्ट पारेका थिए। येशूमा विश्वास गर्नेहरूले मात्र साँचो शान्ति, आनन्द र अनन्त जीवन प्राप्त गर्ने बताउँदै यो निःशुल्क सु–समाचार संसारका सबै व्यक्तिले सुन्नु आवश्यक रहेको र विश्वासद्वारा परमेश्वरको राज्य प्राप्त गर्नुपर्ने कुरा प्रष्ट्याएका थिए।
सु–समाचार, नृत्य तथा गीत–संगीतसहित सम्पन्न उक्त कार्यक्रममा करिब १३० जनाको उपस्थिति रहेको थियो। शनिबार ५२० जनाको उपस्थिति रहेको थियो भने शनिबार र आइतबार छुट्टी नमिल्नेहरूले सोमबार क्रिसमस कार्यक्रम मनाउँदै छन्।
