वालिङ, स्याङ्जा। उपन्यासकार छवि वैरागी घिमिरेद्वारा लिखित उपन्यास “विविशारा”माथी चर्चा परिचर्चा,विमर्श एवम सिर्जना वाचन कार्यक्रम २०८२ सम्पन्न भएको छ ।
स्याङ्जामा साहित्यिक पुनर्जागरणको छैटौँ वर्षोत्सवको सन्दर्भमा वैकल्पिक बाटो पृथक पाइला सिर्जनात्मक अभियान २०७६, स्याङ्जाको ३७ औँ पाइलाको रूपमा आयोजना गरिएको औपन्यासिक कृति विमर्श एवम सिर्जना वाचन समारोह- २०८२ शनिवार दिउँसो वालिङ-६, मिर्दीस्थित नेचुरल भ्यू प्वाइन्ट रेष्टुरेन्टको सभाकक्षमा सम्पन्न गरिएको थियोे ।
कार्यक्रमको पहिलो चरणमा “विविशारा” औपन्यासिक कृतिमाथि केन्द्रित रहेर वक्ताद्वय लक्ष्मीप्रसाद रेग्मी र शान्ता थापाले समीक्षात्मक टिप्पणी प्रस्तुत गरेका थिए भने उपन्यासकार छवि वैरागी घिमिरेले लेखकीय मन्तव्य प्रस्तुत गरेका थिए ।
हालको टेम्केमयुँ गाउँपालिका- ६, भोजपुरमा जन्मिएका सशक्त छन्दकवि एवम आख्यानकार छवि वैरागी घिमिरे हाल सुन्दरहरैँचा नगरपालिका- ९, विराटचोक, मोरङमा रहेर सिर्जना कर्ममा क्रियाशील छन् । उनका दर्जन कृतिमध्ये “विविशारा” दोस्रो औपन्यासिक कृति हो । रेडियो सञ्चारकर्मीका रूपमा एक दशक काम गरिसकेका घिमिरे हाल एक दर्जन हाराहारी साहित्यिक संस्थाको नेतृत्वदायी भूमिकामा रहेका छन् । साधकका रूपमा समेत परिचित उनका एक दर्जन विभिन्न साहित्यिक कृति प्रकाशित छन् । उनी स्थानीयदेखि लिएर राष्ट्रियस्तरका विभिन्न पुरस्कार तथा सम्मानद्वारा पुरस्कृत तथा सम्मानित भइसकेका छन् ।
संसारमा अलौकिक प्रेम अझै मरेको छैन, विश्वास गर्न सकियो भने त्योभन्दा मजबुत अर्को खुशीको जीवन पनि छ भन्ने विषयलाई मूल कथ्य बनाइएको “विविशारा” उपन्यास फिनिक्स बुक्स, काठमाडौले प्रकाशित गरेको हो । विविशारा उपन्यासले अहिले नेपाली पाठकहरूको ध्यान तानेको छ। र आम पाठकले अध्ययन गर्न रुचाइएको पुस्तकका रूपमा बजारमा चर्चा रहेको छ।
अनौपचारिक रूपमा आयोजना गरिएको कार्यक्रमको संयोजन वैकल्पिक बाटो पृथक पाइला सिर्जनात्मक अभियान २०७६, स्याङ्जाका संस्थापक संयोजक युवा कवि तथा साहित्यिक अभियन्ता मिलन समीरले गरेका थिए । समारोहमा स्वागत मन्तव्य अभियानका संस्थापक अभियन्ता युवा कवि युवराज सुवेदीले प्रस्तुत गरेका थिए ।
कार्यक्रमको दोस्रो चरणमा स्याङ्जाली स्रष्टाहरु विष्णु पङ्गेनी पाण्डे, बोधराज न्यौपाने, राजु गैरे , लीलाप्रसाद रेग्मी, अग्निकुमार रेग्मी पल्लव, कमलप्रसाद बगाले, इन्द्रप्रसाद पाठक, झवनाथ बस्याल, दमकुमारी बगाले, युवराज सुवेदी, वसन्त खनाल, प्रेमप्रसाद सुवेदी, दिलीप तिवारी, ढालबहादुर के.सी., लेखनाथ काफ्ले, शम्भु अर्याल, अनन्त अर्याल, ध्रुवप्रसाद शर्मा पङ्गेनी लगायतद्वारा आफ्ना उत्कृष्ट रचनाहरु वाचन गरिएको थियोे ।
