कृष्ण कुँवर। नेपाली महावाणिज्य दूतावास दुबईले संयुक्त अरब इमिरेट्समा रहेका, विशेषगरी उत्तरी भेगका नेपाली नागरिकलाई आफ्नो राहदानी समयमै नवीकरण गर्न आग्रह गरेको छ।
भिजा नवीकरण, यात्रा र अन्य आवश्यक कामका लागि राहदानी अत्यावश्यक भएकाले नागरिकहरूले आफ्नो राहदानीको म्याद जाँच गर्न र समयमै आवेदन दिन दूतावासले आग्रह गरेको हो।
भिजा प्रक्रियाका लागि राहदानीको म्याद कम्तीमा ६ महिनाभन्दा बढी हुनुपर्ने नियमले, म्याद सकिन लागेको वा सकिएको राहदानी हुँदा जरिवाना र अन्य कठिनाइ आउन सक्ने बताईएको छ। हाल काठमाडौँस्थित राहदानी विभागमा छपाईको अत्याधिक चापका कारण केही ढिला भएपनि अधिकांश राहदानी दुई महिनाभित्र वितरण हुने दूतावासले जनाएको छ।
दूतावासले रोजगारदाताहरूलाई पनि कामदारको राहदानी समयमै नवीकरण गराउन सहयोग गर्न स्मरण गराएको छ। साथै, राहदानी होल्डमा राख्नु गैरकानुनी भएको र केही टाइपिङ सेन्टरले रोक्नु अनुचित रहेको जानकारी दिइएको छ।
राहदानी सम्बन्धी जानकारी, आवेदन वा सहयोगका लागि दूतावासलाई कार्यालय समयमा वा फेसबुक, मेसेन्जर, व्हाट्सएप र इमेलमार्फत सम्पर्क गर्न सकिने ०७ कार्तिक २०८२ को सूचनामा उल्लेख गरिएको छ।
