डिकेन्द्र बस्नेत, बनेपा । बनेपा नगरपालिका–१० जनागलमा अवस्थित नाइटिङ्गेल एकेडेमीको आयोजनामा नाइटिङ्गेल स्पोर्ट्स मिट–२०८२ एक विशेष समारोहका बीच सुरु गरिएको छ।
उद्घाटन कार्यक्रम विद्यालयका अध्यक्ष रत्न कुश रजितकारको सभापतित्वमा र श्री मेहर गण धुलिखेलका मेजर ईश्वर बस्नेतको प्रमुख आतिथ्यतामा सम्पन्न भएको हो।
उद्घाटन समारोहका विशिष्ट अतिथिहरूमा बनेपा वडा नं १० का अध्यक्ष चन्द्र बहादुर खड्का, पत्रकार महासंघ काभ्रेपलाञ्चोक शाखा अध्यक्ष विनोद कुमार न्यौपाने, समाजसेवी सत्यमान तामाङ, राज भन्दिर श्रेष्ठ लगायत काभ्रेपलाञ्चोकका सञ्चारकर्मीहरूको उपस्थिति रहेको थियो।
कार्यक्रमलाई सम्बोधन गर्दै प्रमुख अतिथि मेजर बस्नेतले खेलकुदले मिहिनेत, लगनशीलता र जिम्मेवारी बोधको भावना विकास गराउने बताउँदै खेलकुद नै व्यक्तित्व विकासको महत्वपूर्ण माध्यम भएको उल्लेख गर्नुभयो। उहाँका अनुसार खेलकुदको माध्यमबाट नाम र दाम दुवै कमाउन सकिन्छ।
त्यस्तै विद्यालयका अध्यक्ष रत्न कुश रजितकारले विद्यार्थीहरूलाई अनुशासित भएर स्वस्थ प्रतिस्पर्धामा सहभागी हुन आग्रह गर्दै एक महिनाभित्र विद्यालयको छुट्टै फुटसल मैदान निर्माण गरिने जानकारी दिनुभयो। साथै बास्केटबल, भलिबल र ब्याडमिन्टनका लागि पनि होम ग्राउन्ड तयार पारिने योजना रहेको र विद्यालयले चारवटा ब्लकको अवधारणा अघि बढाइसकेको जानकारी दिनुभयो।
वडाध्यक्ष चन्द्र बहादुर खड्काले विद्यार्थीहरूलाई अनुशासित भएर खेलकुदमा सहभागी हुन आग्रह गर्दै वडा खेलकुदको विकासका लागि सहयोग र सहकार्य सधैं सकारात्मक रहने बताउनुभयो।
एक हप्ता सम्म चल्ने यस स्पोर्ट्स मिटमा फुटबल, भलिबल, हाइजम्प, लङ्ग जम्प, स्विमिङ, टग अफ वार र कराँते लगायतका प्रतियोगिताहरू सञ्चालन हुने विद्यालयकी प्रिन्सिपल उमा बस्नेतले जानकारी दिनुभयो।
