✍️ डा. भक्त राई । नेकपा एमाले र नेपाली काङग्रेसको गठबन्धन सरकार छ महिनाको लागि ढल्नु, प्रतिनिधि सभा पनि छ महिनाको लागि फेरिनु, सरकारी ऐतिहासिक दरबार, प्रशासनिक भवन र निजी व्यवसायिक भवनहरुमा आगो लाग्नु, शेरबहादुर देउवा र प्रचण्डका घरमा भएका १०/२० बोरा पैसा र सुनचाँदीमा आगो लाउनु र नेताहरुका घरमा डढाउनु र कुटपिट गर्नु बाहेक अरु के उपलब्धि भयो ? GenZ पुस्ताले माग गरेको यी येजेण्डाहरु हुन त ? बिल्कुल होइन ।
प्रत्यक्ष कार्यकारी राष्ट्रपति वा प्रधानमन्त्री हुने व्यवस्था, अन्तरिम संविधान, भ्रष्टाचार शून्य अवस्था आदिको कुनै ग्यारेण्टी भयो ? अन्तरिम सरकारमा GenZ पुस्ताले चाहेको प्रधानमन्त्री बन्न सके, न त उनीहरुको प्रतिनिधि नै सरकारमा पुग्यो । बरु यो अन्तरिम सरकार त नेपाली सेना र बालेनको निर्देशनमा तयार भयो । अबको छ महिना पछि चुनावबाट निर्वाचित भएर यो देशको सत्ता चलाउने काङ्ग्रेस एमाले नै हो ।
कुनै अन्य दलसङ्ग नमिली माओवादीले देशभरबाट एक सिट पनि ल्याउने अवस्था छैन । रास्वपा आफै सिन्दिन्छ भने राप्रपाको हालत पनि गतिलो छैन । चुनावभित्र रास्वपा र राप्रपा टुकृन्छ वा झन सिद्धिदै जान्छ । यो Genz आन्दोलनले काङ्ग्रेस, एमाले र माओवादीको दोस्रो पुस्तालाई भने निकै फाइदा पुगेको छ ।
उनीहरुले चाहेर पनि हटाउन नसकेको अरिमोट्ठे र वैतरणी गर्न ढिला भैसकेको पार्टीका अध्यक्ष हटाउन केही सहज चाहिँ भएको देखिन्छ यधपि यिनीहरुले अझै पनि पार्टीको नेतृत्त्व छाड्ने छाँट्काँट देखिदैन । हो अब काङ्ग्रेस, एमाले र माओवादीको अध्यक्ष हटाउन पनि उनीहरुको पार्टीभित्रको Genz पुस्ता उठेर यस्तै सुनामी आन्दोलल ल्याएर मात्र हटाउन सक्ने अवस्था छ । होइन चाकरी र चाप्लुसी गरेरै बस्ने हो भने उनीहरु बाँचुन्जेल छाड्ने अवस्था देखिदैन ।
त्यसैले अब देश विकासको लागि नेपालका सबै राजनीतिक दलहरुले शून्यबाटै आआफ्नो राजनीतिक पार्टीलाई शुद्धीकरण गराउँदै लानु पर्दछ । हरेक राजनीतिक दलले आआफ्नो पार्टीलाई सुदृढीकरण होइन शुद्धीकरण गर्नुपर्ने आवश्यकता छ । जबसम्म दल सुध्रदैन तब कसरी त्यही दलका मानिसले चलाएको सरकार इमान्दार हुन्छ ? त्यसैले सर्वप्रथम सबैले आआफ्नो दलको शुद्धीकरण तर्फ लागौं ।
