श्रीराम रानाभाट,दुबई । संयुक्त अरब इमिरेट्स (युएई) नेपालीहरूका लागि रोजगारीको आकर्षक गन्तव्य मात्र नभईकन विभिन्न विधामा आबद्ध भएका कलाकार, खेलाडी, व्यापार व्यवसाय गर्नेहरुको हकमा पनि उत्तिकै आकर्षणको केन्द्रबिन्दु बनेको छ ।
यसरी विविध क्षेत्रमा आफ्नो सफलताको झण्डा गाडिरहेका नेपालीहरूले खेलकुदको क्षेत्रमा पनि आफ्नो छुट्टै छाप बनाउँदै आएका छन् । सुरक्षा ,बिकाश र पर्यटकीय हिसाबले विश्वकै उत्कृष्ट देश युएईमा करिब ७ लाख नेपाली कामदार रहेका छन् । आफ्नो नियमित कामका अलावा फुर्सदको समयमा विभिन्न सांस्कृतिक एवं खेलकुद प्रतियोगिताहरुको आयोजना गरेर कलाकार तथा खेलाडीहरुलाइ प्रोत्साहन गर्ने क्रममा (GCD) रोयल गोर्खा फुटबल क्लबले नेपाली समुदायलाई विशेष गरी दशैंको पावन अवसरमा “पहिलो GCD खुल्ला दशैं कप २०२५’ को आयोजना गर्न लागेको छ ।
यो (7-A-Side) फुटबल प्रतियोगिता अक्टोबर ११, २०२५ का दिन युएईको शारजाह स्थित ‘सेफ जोन’ मा आयोजना हुनेछ। यस प्रतियोगिताले दशैंको उत्सवलाई फुटबलको माध्यमले मनाउने र देशवासीभित्र एकताको भावना कायम राख्ने लक्ष्य राखेको छ ।
यस प्रतियोगिताका मुख्य आयोजक GCD ग्रुप अफ कम्पनीजका अध्यक्ष रमेश श्रेष्ठ रहेका छन् जसले नेपाली समुदायबीच दुबईमा निर्माण गरिएका फुटबल क्लबहरुलाई निरन्तर प्रायोजन गर्दै आएका छन्। उनको संस्थानले यसरी समुदायलाई जोड्ने प्रयासमा सधैं अग्रणी भूमिका निर्वाह गर्दै आएको छ। “रोयल गोर्खा फुटबल क्लब” का टिम मेनेजर नवराज रानाभाटले युएई, कतार, युरोप र नेपालमा फैलिएको नेपाली समुदायले खेलकुदमार्फत पनि आत्मियतालाई कायम राख्ने प्रयास रहेको बताए ।
प्रतियोगिताको आयोजक समितिले “Where Unity Meets Passion — Celebrate Dashain with the Spirit of Football !” (जहाँ एकताले जोशलाई भेट्छन् — फुटबलको भावनाका साथ दशैं मनाऔं !) भन्ने नारा दिएको छ। खेलप्रेमी नेपाली प्रवासीहरुको सहभागिताले यस आयोजनालाई अझै रंगीन बनाउने अपेक्षा गरिएको छ।
