(१)
पिपल ढल्दैछ हेर्नुस् बर ढल्दैछ
बाले बनाएको टाँडे घर ढल्दैछ
इतिहास मेटेर के पाइन्छ होला,
आस्था विश्वास भरोसा भर ढल्दैछ।
(२)
मन भित्रका सारा रहर मारेर
आफैँलाई आफैँले नै एक्लो पारेर
बाँचेको छु म आफैँ बेसहारा भई,
अविरल आँखाबाट आँशु झारेर।
(३)
बनी घाम जस्तै म उदाउन पाउँ
गरी श्रम देशमै रमाउन पाउँ
बनाएर टिका निधारमा जहिल्यै,
मेरै देशको माटो लगाउन पाउँ।
(४)
बिर्सिएर सारा क्रन्दन जस्तै परेपनि
सही आफन्तका गनगन जस्तै परे पनि
देखासेखी छ यो दुनियाँ देखाउनलाई,
बोल्नुपर्छ मिठो वचन जस्तै परे पनि।
(५)
रिस डाहा आरिस त्यागी बाँच्न सक्नुपर्छ
मनभित्रको विष त्यागी बाँच्न सिक्नुपर्छ
हटाएर बैमनस्य सदाचारमा लागि,
बदला र खिस त्यागी बाँच्न सिक्नुपर्छ।
(६)
भरोसा र विश्वासको आभास बन्न मन छ
असहाय दुखीहरूको दास बन्न मन छ
आफ्नै मातृभूमि माथि असल कार्य गरी,
सुनाम चलाएर यहाँ खास बन्न मन छ।
(७)
नदीनाला झरना अनि ताल बन्न मन छ
तरङ्गित हुने निश्चल छाल बन्न मन छ
प्रकृति नदीनाला हिमाल पहाड तराई
सबै अटाउनलाई नेपाल बन्न मन छ।
✍️ सर्जक :- नवराज पोखरेल “नवशिला”
बेलबारी – २, नवदेव मार्ग, लालभित्ती, मोरङ।
