झापा — रोयल स्पोर्टिङ क्लब दमकको आयोजनामा प्रथम रोयल स्कुल स्तरीय रनिङ फुटबल प्रतियोगिता दमक–३ स्थित प्रस्तावित मदन भण्डारी रंगशालामा सुरु भएको छ।
प्रतियोगिताको पहिलो खेल आज सम्पन्न भएको छ, जसको उद्घाटन दमक नगर प्रमुख राम थापाले गरेका थिए। कार्यक्रममा विशिष्ट अतिथिका रूपमा दमक उद्योग वाणिज्य संघका अध्यक्ष गोपाल गुरागाई, दमक नगर प्याब्सन अध्यक्ष नवीन योगी, हिमालयन टाइगर क्लबका केन्द्रीय अध्यक्ष रेवतराज भण्डारी लगायत विभिन्न संघसंस्थाका पदाधिकारीहरूको उपस्थिति रहेको थियो।
प्रतियोगिताको पहिलो खेलमा इन्सपायर इङ्गलिस स्कुलले प्रभावशाली प्रदर्शन गर्दै सनराइज मोडल स्कुललाई ५–० गोलको फराकिलो अन्तरले पराजित गर्यो। इन्सपायर स्कुलका खेलाडी जर्सी नम्बर ६ का जोनिस खेवा लिम्बूले ह्याट्रिक गर्दै “म्यान अफ द म्याच” घोषित भए।
“हाम्रो दमक, हाम्रो सान; खेलाडी उत्पादन गर्ने हाम्रो अभियान” भन्ने मूल नाराका साथ सुरु भएको यो प्रतियोगिताको फाइनल फागुन६ गते सम्पन्न हुने रोयल स्पोर्टिङ क्लबका अध्यक्ष राजु खड्काले जानकारी दिएका छन्।
प्रतियोगितामा प्रथम हुने विजयी समुहलाई नगद रु. ३० हजार, ट्रफी, मेडल र प्रमाणपत्र पाउनेछन् भने उपविजेतालाई नगद रु २० हजार ट्रफी, मेडल र प्रमाणपत्र प्रदान गरिने खेल संयोजक खगेन्द्र बजगाईले बताए। बेस्ट डिफेन्स, बेस्ट किपर, पियर टुर्नामेन्ट, राइजिङ्ग पियर, हाई स्कोररलाई समेत पुरस्कारको व्यवस्था रहेको आयोजक कल्बले जानकारी दिए।
