सप्तरी। सप्तरीको राजविराज नगरपालिकाले नेपाल प्रिमियर लिगको च्याम्पियन जनकपुर बोल्ट्सका खेलाडीलाई सम्मान गरेको कार्यक्रममा सोमबार तोडफोड भएको छ । राज रंगशालामा साँझ जनकपुरका खेलाडीलाई सम्मान गर्ने कार्यक्रम राखिएको थियो ।
खेलाडीलाई सम्मान गर्ने व्यक्तिहरूले राजनीति भाषण धेरै गरेको भन्दै उपस्थित दर्शकले कुर्सी तोडफोड गरेका हुन् । तोडफोडपछि प्रहरी र दर्शकबिच सामान्य विवाद र ठेलमठेल पनि भएको थियो । पछि प्रहरीले स्थिति नियन्त्रणमा लिएपछि कार्यक्रम अगाडि बढ्यो ।
यसअघि, जनकपुरका खेलाडी ट्रफीसहित सिराहा आइपुगेका हुन् । पूर्व–पश्चिम लोकमार्ग हुँदै सिराहा प्रवेश गरेको टोलीलाई जिल्ला प्रवेश विन्दु कर्जन्हा नगरपालिका– ३ बन्दीपुरमा नगरपालिकाले स्वागत तथा सम्मान गरेको हो । सुरक्षाकर्मीको स्कर्टिङमा विजय र्याली आयोजना गरिएको थियो ।
जिल्ला प्रहरी कार्यालयअगाडिको पार्कमा नगर प्रमुखसहित समर्थकहरूले च्याम्पियन खेलाडीलाई अभिनन्दन गरेका छन् । गत ६ पुसमा त्रिवि क्रिकेट मैदानमा सुदूरपश्चिम रोयल्सलाई पाँच विकेटले हराउँदै जनकपुर च्याम्पियन बनेको थियो । मधेश प्रदेशको राजधानी जनकपुरसहित विभिन्न जिल्लामा सर्वसाधारणहरूले टोलीलाई स्वागत गरिरहेको छ ।
