By Dikendra
मोरङ । संयुक्त ख्रीस्टियन समाज उर्लाबारीको आयोजनामा ख्रीस्टमसको अवसरमा शुभकामना आदानप्रदान तथा सम्मान कार्यक्रम भव्य रूपमा मंगलबार सम्पन्न भएको छ।
मोरङको उर्लाबारी–४ स्थित अभिषेक चर्चमा आयोजित कार्यक्रममा प्रमुख अतिथि उर्लाबारी नगर उपप्रमुख मिना पौडेल र अध्यक्षता संयुक्त ख्रीस्टियन समाज उर्लाबारीका अध्यक्ष पास्टर याम लावतीले गर्नुभएको थियो।
यस्तै कार्यक्रममा उर्लाबारी वडा नं ३ का अध्यक्ष भीस्म बुडाथोकी, वडा नं ४ का अध्यक्ष कल्याण कुमार राई, वडा नं ५ का कार्यवाहक अध्यक्ष विनोद धिमाल, वडा नं ७ की अध्यक्ष उर्मिला सुवेदी, वडा नं ८ का अध्यक्ष कुल बहादुर कार्की, कार्यपालिका सदस्य सन्त कुमारी विश्वकर्मा र कृष्ण माया कडरीया, एमाले नगर अध्यक्ष गंगाराम बास्तोला, माओवादी केन्द्र अध्यक्ष गजेन्द्र दङगाल, नेपाली कांग्रेस नगर सचिव राजन रायमाझी, जसपा नेपाल नगर अध्यक्ष मात्रिका धिमाल लगायतको उपस्थिति रहेको थियो।
पथरी शनिश्चरे नगर ईसाई समाजका अध्यक्ष पास्टर गोपाल नाछिरिङ राई र दमक नगर ईसाई समाजका सल्लाहकार पास्टर राज कुमार नाछिरिङ राईले कार्यक्रमलाई थप गरिमा प्रदान गर्नुभएको थियो।
कार्यक्रमका वक्ता गुड न्युज चर्चका पास्टर राज कुमार नाछिरिङ राईले ख्रीस्टमसको मुख्य उद्देश्य परमेश्वरको प्रेम र मानव जातिको सेवामा समर्पित हुने प्रेरणा रहेको बताउनुभयो। उहाँले छिमेकी, समाज, र मण्डलीलाई सहयोग गर्न र प्रेम बाँड्न आग्रह गर्नुभयो।
प्रमुख अतिथि उपप्रमुख पौडेलले ख्रीस्टमसको सन्देशले समाजमा सहिष्णुता र क्षमाको भावना विकास गर्न मद्दत गर्ने बताउँदै, सबै धर्म र धर्मशास्त्रको अध्ययन गर्नुपर्नेमा जोड दिनुभयो।
यस अवसरमा उर्लाबारी नगरभित्र बसोबास गर्ने २१ जना एकल महिलाहरुलाई न्यानो दोसल्ला ओढाएर सम्मान गरिएको आयोजक ख्रीस्टियन समाजले जनाएको छ।
कार्यक्रमको स्वागत मन्तव्य पास्टर विनोद धिमालले गर्नुभएको थियो भने सञ्चालन पास्टर दिपक न्यौपानेले गर्नुभयो।
त्यस्तैं, सो कार्यक्रममा संगित झुन्डले सांगीतिक ख्रीष्टमस गीतहरु तथा नृत्य प्रस्तुत गरेर सहभागिहरुलाई मनोरञ्जन प्रदान गरिएको थियो ।
शुभकामना आदानप्रदान कार्यक्रमपछि सहभागीहरूलाई मायाको चिनो प्रदान गर्दै प्रेम भोजनको आयोजना गरिएको थियो।
