हिमांशु राय , मोरङ । केपी घिमिरेद्वारा सञ्चालित नझरेका फूलहरूको आयोजनामा लोकप्रिय गीतकार दुर्गा प्रसाद खनाल (डि.पि) को स्वास्थ्य उपचारका लागि सहयोगार्थ पलेँटी साँझ हुने भएको छ।
मोरङको विराटचोक स्थित प्लानेट लाउञ्जमा पौष १७ गते मङ्गलवार आयोजित पलेँटीलाई यसपटक ‘गीताञ्जली साँझ’ नाम दिइएको आयोजक तथा नझरेका फूलहरूका परिकल्पनाकार,संस्थापक एवम् प्रस्तोता केपी घिमिरेले बताएका छन्।
विगत दुई महिनादेखि स्वास्थ्यमा गम्भीर समस्या भई उपचाररत गीतकार खनालका सयौँ गीतहरू लोकप्रिय छन्। उनका रचनामा रहेका गीतहरू नेपाली साङ्गीतिक क्षेत्रका ख्यातिप्राप्त लगभग सबै गायक गायिकाले गाइसकेका छन्। गीतकार खनालको उपचारमा केही सहयोग पुगोस् भन्ने उद्देश्यले साङ्गीतिक कार्यक्रम आयोजना गर्न लागिएको र यस अभियानमा थुप्रै मनकारी व्यक्तिहरूबाट आर्थिक सहयोग प्राप्त भइरहेको समेत घिमिरेले बताएका छन्।
गीतकार खनालको उपचारको सहयोगार्थ यस कार्यक्रमका निम्ति गायनशिरोमणि रामकृष्ण ढकाल,लोकप्रिय गायक हेमन्त शर्मा,राज सिग्देल,तुलसी पराजुली,प्रविशा अधिकारी, गीतकार किरण के उप्रेती,गायक निमा शेर्पा,साहित्यकार पुरन राई लगायतबाट आर्थिक सहयोग प्राप्त भैसकेको र थप महानुभावबाट पनि सहयोग आउने क्रम जारी रहेको गीतकार समेत रहेका प्रस्तोता घिमिरेले जानकारी दिएका छन् ।
नझरेका फूलहरूको ४१औँ शृङ्खलाका रुपमा मङ्गलवार आयोजना हुने गीताञ्जली साँझमा गायिका पम्फा चाहार, मेरिना राई,अनु बुढाथोकी गिरी,निशा कार्की तथा गायक दुर्गा पराजुली,कृष्णराजा श्रेष्ठ लगायतले झण्डै दुईदर्जन भन्दा बढी गीतहरू सुनाउने बताइएको छ।
गत २०८० पुस ११ गते बुधवार गीतकार संघ नेपाल का अध्यक्ष वसन्त वित्यासी थापा द्वारा हस्ताक्षरित एक अपिल जारी गरि साहित्यकार तथा चर्चित गीतकार दुर्गा प्रसाद खनाल( डि.पि.) को स्वास्थ्य प्रती चिन्ता र चासो ब्याक्त गर्दै सबैमा आर्थिक सहायताको लागि अपिल गरेकाछन्।
आफ्नै स्रोतबाट मात्र उपचार खर्च जुटाउन सम्भव नदेखिएको ले उनको जीवन रक्षाका लागि व्यक्तिगत र संस्थागत रुपमा यथासक्य आर्थिक सहयोग गर्न स्वदेश तथा विदेशमा रहेका सर्जक, कलाकार, प्राविधिक एवं समग्र सङ्गीतप्रेमी नेपालीहरुमा गीतकार सङ्घ नेपालले हार्दिक अपिल गरेको थियो।
साहित्य,कला र सङ्गीतप्रेमी दर्शक स्रोतालाई यहि पौष १७ गते हुने कार्यक्रममा सहभागिताका निम्ति निशुल्क प्रवेशको व्यवस्था गरिएको र कार्यक्रम साँझ ६:३० बजेबाट सुरु हुने नझरेका फुल आयोजक का तर्फ बाट के.पि. घिमिरेले जानकारी गराए।
