काठमाडौं । राष्ट्रपति विद्यादेवी भण्डारीले सवा १६ खर्बको बजेटमा लालमोहर लगाएकी छिन् । राष्ट्रपतिले केही समय अघि अध्यादेशमार्फत ल्याउन लागिएको बजेटमा लालमोहर लगाएकी हुन् । मन्त्री रिषदले आगामी आर्थिक वर्षको बजेट पारित गरेपछि राष्ट्रपतिले बजेटमा लालमोहर लगाएकी हुन् ।
अर्थमन्त्री बिष्णु पौडेलले आर्थिक वर्ष २०७८/७९ को बजेट आज ४ बजे सार्वजनिक गर्दैछन् । सरकारले आगामी आर्थिक वर्षमा ८ प्रतिशतको हाराहारीमा आर्थिक वृद्धिदर हासिल हुने गरी बजेट तयार पारेको छ । सरकारले आगामी आर्थिक वर्षमा ८ देखि ९ प्रतिशतसम्म आर्थिक वृद्धिदर हुने अनुमान अर्थ मन्त्रालयले गरेको छ ।
राष्ट्रपतिबाट जारी भएको बजेट अध्यादेश राजपत्रमा प्रकाशित नगर्दै अर्थमन्त्री पौडेलले सिंहदरबारबाट वाचन गर्ने छन् । अर्थमन्त्रालय स्रोतका अनुसार चालु आर्थिक वर्षको भन्दा १० प्रतिशतको हाराहारीमा बजेटको आकार बढाइएको छ । चालु आवको बजेट १४ खर्ब ७४ अर्ब विनियोजन भएको थियो । आगामी आवको लागि भने सवा १६ खर्बसम्मको बजेट आउने निश्चित जस्तै भएको छ ।
बजेटको स्रोत व्यवस्थापनमा भने १० खर्ब राजस्व, झन्डै ३ खर्ब बाह्य ऋण, सवा २ अर्ब आन्तरिक ऋण र ६० अर्ब अनुदान रहेको छ ।
बजेटमा २५ वटा राष्ट्रिय गौरवका आयोजन सहित प्रधानमन्त्री केपी शर्मा ओलीले शिलान्यास गरेका १ सय ६५ वटा रणनीतिक सडक र केही समय अगाडि शिलान्यास भएका स्वास्थ्य संस्था निर्माणका लागि आवश्यता अनुसार बजेट विनियोजन भएको छ ।
आन्तरिक विमानस्थलको स्तरोन्नती, स्वास्थ्य पूर्वाधार, पर्यटन पूर्वाधार र सडक निर्माणको लागि पनि चालु आवमा विनियोजन भएको बजेट भन्दा बढी विनियोजन भएको छ । सरकारले रेल र पानी जहाज सञ्चालन गर्न पनि बजेट विनियोजन गरेको छ ।
चुनावी खर्चदेखि स्वास्थ्य सेवामा विस्तार, कोभिड नियन्त्रण, रोगथाम तथा यसबाट प्रभावित क्षेत्रको पुनरउत्थानको लागि बजेट विशेष प्याकेज सहित बजेट निर्माण भएको छ ।
कृषि भण्डार निर्माणदेखि कृषि आधुनिकीकरण परियोजना र प्रधानमन्त्री रोजगार कार्यक्रमले पनि बजेटमा निरन्तरता पाएका छन् । तराईमा सिँचाईदेखि तटबन्ध निर्माण र चुरे संरक्षणमा पनि रकम विनियोजन गरिएको डिजिटल नेपालको अवधारण साकार बनाउने कामको लागि पनि रकम विनियोजन भएको छ ।
onlinekhabar.com
