उमेश भुजेल-जेठ १३,सिन्धुली। सिन्धुलीको फिक्कल गाउँपालिकाले कोरोना संक्रमणबाट संक्रमितको मृत्यु भएको शव सदगद गर्ने स्थान तोकेको छ । गाउँपालिकाले बनाएको वा होम आइसोलेसन मृत्यु भएमा शवलाई तिजु खोलाको किनारको पुरानै एक घाटलाई निर्धारण गरिएको गाउँपालिकाले जनाएको छ । कोरोना भाइरस रोकथाम तथा नियन्त्रण समितीले नेपाली सेनाको सहयोगमा घाटमा लगेर जलाउने संस्कार भए वा जमिनमा गाड्ने संस्कार भए जितु खोलाको पुरानै एक घाटमा सदगद गर्ने निर्णय गरिएको गाउँपालिका अध्यक्ष धनबहादुर कार्कीले बताए ।
‘संक्रमणको समयमा सदगद सम्वन्धी समस्या आउन सक्ने भएकाले समितीले यस्तो निर्णय गरेको उनको भनाई छ । यस्तै गाउँपालिकाले कोरोनासंग लड्नको लागि खाङसाङ बेसीको सुनकोसी माध्यामिक विद्यालयमा अक्सिजन सहितको १० बेडको आइसोलेसन केन्द्र निमार्ण गरेको छ । संक्रमितलाई आइसोलेन केन्द्रसम्म ल्याउन र रेफर गरिएको विरामीलाई बाहिर पठाउँनको लागि दुई वटा एम्बुलेन्स तयारी अबस्थामा रहेको गाउँपालिकाले जनाएकोछ ।
गाउँपालिकाले बैशाख २५ गते देखी दुई पटक निषेद्याज्ञाको समय समय थपेर आगामी जेठ २२ गतेसम्म लम्ब्याएको गाउँपालिका अध्यक्ष कार्कीले बताए । आवाज कोरोना भाइरस बढ्दो संक्रमणलाई मध्यनजर गर्दै गाउँपालिकाले बाहिरी जमघटमा हुने नाचगान, भोजभतेर, विवाह, व्रतवन्ध, देवाली, साकेला चाड (उभौली) जस्ता कार्यहरुले थप संकट आउन सक्ने भएकाले घरभित्रै औपचारिकतामा सिमित राख्न आग्रह गरेको छ । गाउँपालिकाले वडा कार्यालय र सेवा केन्द्रबाट प्रवाह हुँदै आएको अत्यावश्यक बाहेकका सबै सेवा जेठ २२ गतेम्मका लागि बन्द गरेको जनाएको छ।
