उमेश भुजेल-जेठ १२, खोटाङ। खोटाङमा कुलपुजा (देवाली) गर्दै गर्दा दुई पुजारी सहित पाँच जना पक्राउ परेका छन । जिल्लाको रुपाकोट मझुवागढी नगरपालिका ४ खाल्लेबाट उनीहरुलाई पक्राउ गरिएको हो। व्यापक रुपमा मानिसहरुको भेला जम्मा गरि कुलपुजा (देवाली) गर्दै गरेको अवस्थामा उनीहरुलाई नियन्त्रणमा लिइएको जिल्ला प्रहरी कार्यालय खोटाङका प्रहरी नायव उपरिक्षक नारायण प्रसाद चिमरियाले जानकारी दिए।
विगत लामो समयदेखि विश्वव्यापी महामारीको रुपमा फैलिएको कोरोना भाइरसको दोस्रो लहरको चपेटामा रहेको यो अवस्थामा बिहे, भोजभतेर, जमघट, साकेला पर्व, देवाली लगाएतका सामाजिक कार्य नगर्न भनिए पनि उनीहरुले देवाली गरिरहेको सूचनाका आधारमा नियन्त्रणमा लिइएको चिमरियाको भनाई छ। मानिस भेला भएको, अनावश्यक रुपमा घर बाहिर निस्कने र भेला जम्मा गरि सामाजिक कार्य गरेको थाहा पाए तत्काल नियन्त्रणमा लिएर कारवाही गर्न जिल्लाभर सुरक्षा निकायलाई परिचालन गरिएको उनको भनाई छ।
जिल्ला प्रशासन कार्यालयले निकालेको विज्ञप्तीमा कोरोना भाइरसको संक्रमण जोखिमलाई मध्यनजर गरि समुहमा गरिने कुल पुजा (देवाली), साकेला पर्व लगायतका विभिन्न चाडपर्व र सामाजिक कार्यहरु नगर्ने, मनाउनै पर्ने भए घर परिवार भित्रका सदस्यहरुले मात्र विधि फुकाउने व्यवस्था गरि मनाउने, विकास निर्माण सम्वन्धि कार्यहरु संचालन गर्दा निर्माण कार्यसँग सम्वन्धित कर्मचारी तथा कामदारलाई निर्माणस्थलमै राख्ने (खाने बस्ने) व्यवस्था मिलाएर मात्र संचालन गर्ने भनिएको छ। बिहे, भोजभतेर, जमघट, साकेला पर्व, देवाली लगाएतका सामाजिक कार्य नगर्न भनिएको अवस्थामा कोही कसैले जवरजस्त यस्ता कार्य गरे संक्रामक रोग ऐन २०२० तथा प्रचलित कानुन बमोजिम कारवाही गरिने प्रमुख जिल्ला अधिकारी मित्रलाल शर्माले जानकारी दिए।
जिल्लाका १० वटै स्थानीय तहमा कतै विहेमा, कतै गुन्युचोलीमा सहभागीता हुँदा, कतै, रुद्रीपुजामा कतै भोजभतेर र कतै बाहिरबाट घर आएर क्वारेन्टिनमा नबसी तथा परीक्षण नगराई डुल्दिँदा र स्वास्थ्य सुरक्षाका न्यूननतम मापदण्ड पालना नगर्दा सल्केको कोरोना अहिले गाउँका कुनाकन्दरामा भुसको आगो झै फैलिएको छ। जिल्लाभर कोरोना सक्रिय संक्रमितको संख्या ५४६ पुगेको छ। दुई जनाले ज्यान गुमाएका छ्न्।
