नवलपुर । नेपाल पत्रकार महासंघ नवलपुर शाखाले कोभिड संक्रमित पत्रकारलाई सहयोग प्रदान गरेको छ । पत्रकार महासंघ नवलपुर शाखाले निर्माण गरेको पत्रकार कल्याण कोष मार्फत जिल्लामा महासंघमा आवद्ध कोभिड संक्रमित तीन जना पत्रकारलाई सहयोग प्रदान गरेको हो । शाखाका अध्यक्ष विरेन्द्र पराजुली, कोष परिचालन समितिका संयोजक नविन पौडेल, विष्णु गौडेल, दयाराम आचार्य ,धनु भुषाल सहितको टोलीले संक्रमित पत्रकारलाई सोमबार सहयोग रकम हस्तान्तरण गरेको हो ।
कोष परिचालन समितिको बैठकको निर्णय अनुसार तीन जना सदस्यलाई जनही रु.५ हजार प्रदान गर्ने निर्णय अनुसार सहयोग रकम हस्तान्तर गरिएको संयोजक पौडेलले बताउनुभयो । पत्रकारलाई भईपरि आउने जोखिम, दुर्घटना, विपदमा सहयोग गर्ने उद्येश्यले नेपाल पत्रकार महासंघ नवलपुर शाखाले पहिलो पटक कोषको स्थापना गरेको महासंघ अध्यक्ष पराजुलीले बताउनुभयो । महासंघले कार्यवीधि निर्माण गरि सोमबार नै कार्यसमितिको बैठकबाट पास गरेको अध्यक्ष पराजुलीले बताउनुभयो । कार्यवीधि पारित भए लगतै कोषका बिभिन्न सहयोगी दाताहरुबाट प्राप्त रकम मार्फत कोभिड संक्रमित पत्रकारलाई सहयोग उपलब्ध गराईएको हो ।
कोष स्थापना संगै यसमा सहयोग रकम समेत जुटीरहेको कोष परिचाल समितिका संयोजक पौडेलले बताउनुभयो । सोमबार कोषमा पत्रकार महासंघका जिल्ला कार्यसमित सदस्य अर्जुन अविरलले आफ्नो जन्मदिनको अवसरमा रु.४ हजार ४४४ प्रदान गर्नु भएको छ । आइतबार मात्रै कोषमा शाखाका कार्यसमिति सदस्य दयाराम आचार्यले आफ्नो जन्मदिनको अवसरमा रु.५ हजार १०० प्रदान गर्नुभएको थियो । यस अघि समेत कोषमा बिभिन्न ब्यक्तिबाट सहयोग रकम प्राप्त हुदै आएको छ ।
नवलपुर टुडेबाट साभार
