खोटाङ। बैशाख ३० मा सम्पन्न स्थानीय तह सदस्य निर्वाचनमा पूराना धेरै जनप्रतिनिधिले दोश्रो कार्यकाल दोहोराउन उम्मेदवारी दर्ता गराएका थिए ,तर उनीहरुले हार स्विकार गर्न आध्य भए ।
दोश्रो कार्यकाल दोहोराउन उम्मेदवारी दर्ता गराएका भिडमा यस्ता पनि जनप्रतिनिधि भेटिए जसले दोश्रो कार्यकालका लागि पनि जनताको मन जितेर विजय हाँसिल गरे । जनताको मतलाई सुरक्षित गरे । पार्टीको विश्वास र टिकटलाई पुनः अर्को ५ वर्षलाई पकडमा राखिदिए ।
दिक्तेल रुपाकोट मझुवागढी नगरपालिकामा माथि उल्लेख गरे जस्तै भएको छ । यहाँको वडा नं.६ नेर्पामा माधव राई पुनः दोश्रो कार्यकालका लागि जनताको मन जितेर वडाध्यक्षमा निर्वाचित भएका छन्। २०७४ सालको स्थानीय तह सदस्य निर्वाचनबाट नेकपा माओवादी केन्द्रबाट वडाध्यक्षमा निर्वाचित भएका राई दोश्रो कार्यकालका लागि पनि निर्वाचित भएका हुन्।राईले ६०१ मत पाएका थिए । त्यहाँ वडामा माओवादी केन्द्र र नेकपा एकीकृत समाजवादी पार्टीले गठबन्धन गरेको थियो।
दिक्तेल रुपाकोट मझुवागढी नगरपालिका–८ दोर्पा चिउरीडाँडाको वडाध्यक्षमा एमालेका लिला कुमार चौहान पुनः दोहोरिएका छन्।
यसअघिको निर्वाचनमा पनि एमालेबाट वडाध्यक्षमा निर्वाचित भएका चौहान गठबन्धनलाई हराउँदै दोश्रो कार्यकालका लागि भारी मतले वडाध्यक्षमा निर्वाचित भएका हुन्। चौहानले ५९७ मत ल्याएर विजयी हाँसिल गरेका हुन्।
यस्तै, दिक्तेल रुपाकोट मझुवागढी नगरपालिका–१० पाथेकाको वडाध्यक्षमा जनता समाजवादी पार्टीका मुगाधन राई पनि पपुलर मतका साथमा दोहोरिएका छन्। राईले ७५५ मत पाएका थिए। पाथेका वडामा जसपा, माओवादी केन्द्र र नेकपा एसवीच गठबन्धन भएको थियो।
यसैगरी, दिक्तेल रुपाकोट मझुवागढी नगरपालिका–१४ बुईपाको वडाध्यक्षमा एमालेबाट दिनेश राई दोश्रो कार्यकाललाई दोहोरिएका छन्। यसअघिको निर्वाचनमा पनि वडाध्यक्षमा निर्वाचित उनले यस पटक गठबन्धनलाई परास्त गर्दै र जनताको मन जित्दै विजयको झण्डा फहराए।
राईले १ हजार १११ मत पाएका थिए। ५ वर्षको कार्य सम्पादनका आधारमा पुनः जनताले निर्वाचित गराएको वडाध्यक्ष राईले बताए।
सोल्माका निवर्तमान वडाध्यक्ष हर्क खत्री, खाल्लेका डिल्ली राई र खामीका रामचन्द्र राईले दोश्रो कार्यकालका लागि वडाध्यक्षमै उम्मेदवारी दिए पनि जनताको मन जित्न सकेनन्। अन्ततः हार ब्यहोर्नु पर्यो ।
समायोजन खबरबाट सभार
