काठमाडौं । हुम्ला जिल्लाकी एक्ली सांसद रंगमति शाहीले उत्तरी छिमेकी चीनले हुम्लामा सीमा नमिचेको प्रतिपक्षी दलका नेता तथा पुर्व प्राधनमन्त्रीको अभिव्यक्तिमा आपत्ति जनाएकी छन्।
सरकारको नीति तथा कार्यक्रममाथि संसदमा जारी छलफलमा भाग लिँदै सांसद शाहीले प्रतिपक्षी दलका नेता तथा पुर्व प्राधनमन्त्री केपी शर्मा ओलीले नमिचिएको भूमि मिचिएको छ भनेर बबण्डर मच्याइयो भनेर झुटा भाषण गरेकोमा आपत्ति जनाएकी हुन्।
शाहीले ओलीलाई समय दिन आग्रह गर्दै सीमाको तस्बिर नै देखाएर कहाँ कहाँ मिचिएको छ भनेर देखाउने पनि उल्लेख गरिन।आफू स्थलगत अवलोकनमा गएको जानकारी गराउँदै सिंहदरबार र हेलिकोप्टरमा नदेखिएको मिचिएको भूभाग आफूले तस्बिरमार्फत देखाउने चुनौती दिइन्।
नमिचिएको भूमि मिचिएको छ भनेर बबण्डर मच्याइयो भनेर ओलीले हुम्ला पुगेर अभिव्यक्ति दिएको र यो झुटा भएको शाहीको भनाइ थियो ।
‘हुम्ला पुगेर सीमा मिचिएको छैन भन्नुभयो। पहिला सिंहदरबारबाट मिचिएको देखिएन। अस्ति हेलिकोप्टरबाट पनि देख्नुभएनछ,’ उनले भनिन्, ‘म चुनौती दिन चाहन्छु म त्यहाँ स्थलगत भ्रमण गरेर आएको छु, म सँग फोटो छ। मैले तपाईलाई फोटो हेर्न आउन त भन्दिन। तपाईले समय दिनुहुन्छ भने म यो फोटो देखाएर कहाँ कहाँ के के भएको छ भन्ने कुरा ब्रिफिङ गर्छु। अनि त्यसपछि मात्र मलाई जवाफ दिनुहोला। हुम्ली जनतालाई जवाफ दिनुहोला।’
