काठमाडौं। नेकपा एमालेले कांग्रेस सभापति शेरबहादुर देउवालाई प्रधानमन्त्री बनाउन भनेर आफ्नो दलका सांसदहरुको हस्ताक्षर किर्ते गरिएको भन्दै राष्ट्रपति कार्यालयमा पत्र दर्ता गराएको छ। प्रधानमन्त्रीका कानुनी सल्लाहकार समेत रहेका एमाले निर्वाचन विभागका नेता बाबुराम दाहालले केहीबेर अघि शीतलनिवाशमा पत्र दर्ता गराएका हुन्।
देउवालाई समर्थन गरी हस्ताक्षर नगरेको र पार्टी अध्यक्ष केपी ओलीलाई नै समर्थन गरेको भन्ने सांसद जयकुमार राईको पत्र र अन्य सांसदको समेत असहमति रहेको कागजातसहित राष्ट्रपति कार्यालयमा पार्टीको तर्फबाट पत्र बुझाएका हुन। हाम्रो पत्रमा एमाले दलको सांसदको हस्ताक्षर अन्यत्र कतै परेको भए त्यसलाई बैधता नदिन र त्यसअधारमा कुनै निर्णय नगर्न माग गरेका छौं,’दाहालले भने, ‘एमाले सांसदको हस्ताक्षर किर्ते गरी प्रधानमन्त्रीको दावी पर्न आएको भन्ने सूचना पाएपछि हामीले पार्टीको बिधान, राजनीतिक दल सम्बन्धी ऐन र संबिधान बिपरितको काम नहोस भनेर राष्ट्रपतिको ध्यानाकर्षण गराएको छौं।’
एमालेले पत्रमा अन्यत्र हस्ताक्षर गरेको प्रमाणित भएमा पार्टीले कार्वाही गरी सांसद पदबाटै मुक्त हुने भन्दै एमाले सांसदले अन्यत्र हस्ताक्षर गर्न नमिल्ने संबैधानिक आधारसमेत राखेको छ। दाहालले सांसदहरुको हस्ताक्षर दुरुपयोग भएका र झुक्याएर हस्ताक्षर गराइएका विषयहरु आएपछि डकुमेन्टहरु राष्ट्रपति कार्यालयमा बुझाइएको जानकारी दिए। राष्ट्रपति बिद्यादेवी भण्डारीले प्रधानमन्त्रीको दावी गर्ने दुवै पक्षका कानुनी आधारहरु अध्ययन गरिरहेकाले एमालेका सांसदहरुको हस्ताक्षर दुरुपयोगको विषय जानकारी गराइएको हो।
एमालेका सांसदहरुको हस्ताक्षर दुरुपयोग भएकोले एमालेका कुनै पनि सांसदको नाममा विपक्षी दलले गरेको दावीलाई मान्यता नदिन अध्यक्ष केपी शर्मा ओलीले पठाएको पत्रमा आग्रह गरिएको छ। हस्ताक्षर दुरुपयोगको छानबिन भइरहेको र कारवाहीको प्रक्रियामा रहेको जानकारी समेत दिइएको छ।
यी हुन् कारवाहीमा पर्न सक्ने नेताहरु :
माधवकुमार नेपाल
झलनाथ खनाल
भीम रावल
सुरेन्द्र पाण्डे
घनश्याम भुसाल
मुकुन्द न्यौपाने
यज्ञराज सुनुवार,
रामकुमारी झाँक्री
मेटमणि चौधरी
पवित्रा निरौला,
झपट रावल,
जीवनराम श्रेष्ठ
भवानी खापुङ
विरोध खतिवड
सोमप्रसाद पाण्डे
नारायण खतिवडा
गणेश पहाडी
जयकुमार राई
दीपकप्रकाश भट्ट
हीराचन्द्र केसी
पुष्पाकुमारी कर्ण कायस्थ
कल्याणी खड्का
लक्ष्मीकुमारी चौधरी
कृष्णलाल महर्जन
सरलाकुमारी यादव
नीरादेवी जैरू
