जेठ५, लम्जुङ- एकाबिहानै भूकम्प जाँदा भएका क्षतिका विवरणहरु आउन थालेका छन् । पछिल्लो अपडेट अनुसार लम्जुङमा सात वटा घर भ त्के का छन् । भूकम्पले घर भ त्किँदा तीनजना गाउँले घाइते भएका छन् ।
प्रहरीका अनुसार मर्स्याङ्दी गाउँपालिकाका ४० वर्षीया उमा गुरुङ र ८३ वर्षीया खवकुमारी पाण्डे घाइते भएकी छिन् । अर्का एकजना घाइतेको नाम खुलेको छैन ।
लम्जुङका डिएसपी गंगाबहादुर थापा का अनुसार अहिलेसम्म सात वटा घर भ त्केका छन् । घाइतेको संख्या केही बढ्न सक्ने सम्भावना रहेको थापाले बताए । उनका अनुसार भत्किएका सबै कच्ची घर हुन् । घाइतेलाई जिल्ला अस्पतालमा उपचारका लागि ल्याइएको उनले बताए । गाउँमा कच्ची घर भएकोले पनि भूकम्पले भत्किएर स्थानीय घाइते हुन पुगेको उनले बताए ।
लम्जुङको भूलभूले, बाँझाखेत आसपासमा केन्द्र रहेर बुधबार बिहान ५ बजेर ४२ मिनेटमा ५.८ म्याग्नीच्युडको भूकम्प गएको राष्ट्रिय भूकम्प मापन तथा अनुसन्धान केन्द्रले जानकारी दिएको छ । त्यही भूकम्पमा परेर केन्द्रबीन्दु आसपासका केही घरमा क्षति पुगेको लम्जुङ प्रहरीले बताएको छ ।भूकम्पको धक्का लम्जुङसहित आसपासका मनाङ, गोरखा, तनहुँ, कास्कीसम्म पुगेको छ ।
