नेपालगञ्ज । नेपालगञ्ज नाकाबाट दैनिक सयौं भारतीय नागरिक विभिन्न कामको सिलसिलामा नेपाल आउँछन् । पहाडी जिल्लाका नेपाली भारतमा मौसमी काम गर्न गएको जसरी सयौं भारतीय नागरिक दैनिक नेपालगञ्ज नाकाबाट मजदुरी गर्न नेपाल प्रवेश गर्छन् ।
भारतबाट आउने यी मजदुरको नाकामा कोरोना जाँच हुँदैन । भारतमा ओमिक्रोनको संक्रमित बढिरहँदा भारतबाट आउने मजदुरले जोखिम बढाएका छन् । भारतबाट आउने नेपालीको जाँच भएको जसरी दैनिक मजदुरीका लागि आउने भारतीय नागरिकको पनि कोरोना गर्न आवश्यक देखिन्छ ।
बिहान खाना बोकेर आउने र साँझ फर्किने भारतीय मजदुरको संख्या ठूलो रहेको छ । नेपालगञ्ज औद्योगिक क्षेत्रभित्रका उद्योगहरूमा काम गर्ने अधिकांश कामदार भारतीय नागरिक रहेका छन् । उनीहरू बिहान आउँछन् र काम गरेर साँझ घर फर्किन्छन् ।
मंगलबार नेपालगञ्ज नाकामा दाङ तुलसीपुरको इँटाभट्टा र स्वर्गद्वारी तीर्थ जान थालेका तीन जना भारतीयलाई कोरोना देखिएपछि भारतबाट दैनिक मजदुरी गर्न आउनेले नेपालमा कोरोनाको जोखिम बढाएको पुष्टि गरेको छ । नेपाल समाचारपत्र
