काठमाडौं। कुमारी बाँठा मगर (मनु)द्वारा लिखित उपन्यास ‘पीडाको पोखरी’ र गीति एल्बम ‘जोवन बैना देउ’ दुई कृति एकै साथ बिमोचन भएको छ । उपन्यसका सम्पादक गोबिन्द कँडेल ‘आँसु’को शभापतित्व र राष्ट्रिय गानको रचनाकार प्रदीप कुमार राई ‘ब्याकुल माईला’को प्रमुख आतिथ्यमा उक्त कृति विमोचन भएको थियो ।
उपन्यास लेख्नु आफैंमा एक गहनकार्य भएको त्यो माथि पनि यति सरल भाषामा लेख्न सक्नु महान कार्य हो भन्दै सबै बक्ताहरुले रचनाकारको तारिफ गरेका थिए । कार्यक्रममा गीति एल्बम ‘जोवन बैना देउ’बारे बोल्दै संजोग लाफा मगरले वास्ताविक कौडा गीतलाई तोडमोड गरेर दोहोरी जस्तो बनाउने कार्यले कौडा गीत माथि अन्याय भईरहेकोले त्यसमा ध्यान पुर्याउन सर्जक र एल्बम निर्माण पक्षलाई सजग गराएका थिए ।
कार्यक्रममा विशेष अतिथि चर्चित समालोचकद्वय राजकुमार बानियाँ र महेश पौडेलले पुस्तकको बारेमा आफ्ना धारणा व्यक्त गरेका थिए । कार्यक्रममा बोल्दै समालोचकद्वयले उपन्यासको रचनाकार कुमारी बाँठा मगर (मनु)को खुलेर प्रसंसा गरेका थिए । वास्ताविक घटनालाई देखेर नै लेखे झैं गरी सामान्य मानिसले समेत बुझ्ने भाषामा लेखिएको यो उपन्यासका पात्रहरुलाई पनि सही ठाउँमा उभ्याएर सामाजिक अवस्थाको चित्रण गर्न सक्नुले रचनाकारको असाधरण क्षमताको प्रष्फुटन भएको पाईएको समाचोलकद्वयले बताए ।
गायक तथा संगीतकार योगेश काजी शाहले लोक संस्कृतिको संरक्षणले मात्रै कलाकारलाई वास्ताविक परिचय गराउने महसुस भएपछि आफुपनि पप गीतबाट लोक गीततिर आएको बताए । प्रमुख अतिथि ब्याकुल माईलाले आफ्नो संस्कृतिभन्दा ठुलो अरु हुनै नसक्ने भन्दै यसलाई जोगाएर राख्न लागिपर्ने सबै सर्जक र कलाकारलाई सदैब सम्मान गर्ने बताए । आधुनिकताको जगमा भुल्दै गएको संस्कृतिलाई जोगाउन नयाँ पूस्तालाई प्रशिक्षित गराउनु हामी सबैको दायित्व भएको उनले बताए ।
कार्यक्रममा कुमारी बाँठा मगर (मनु)को शब्दमा दुर्लभ जेठामान र तारा श्रीषको स्वर रहेको गीति एल्बम ‘जोवन बैना देउ’को पनि बिमोचन भएको थियो । गुडलक नेपालको अफिसियल युट्युब च्यानल मार्फत दर्शकमा ल्याईएको सो गीतमा अनुप राना, प्रिया घर्तीमगर र अन्जली गुरुङको अभिनय रहेको छ भने नृत्य तथा निर्देशन केशु पुन मगरको रहेको छ ।
