काठमाडौं – नेकपा एमालेका नेता सुरेन्द्र पाण्डेले माधव नेपाल समूहले पार्टी विभाजन गरेर धोका दिएको बताएका छन् । मंगलबार पोखरामा पार्टी कार्यकर्ता भेलालाई सम्बोधन गर्दै पाण्डेले सो कुरा बताएका हुन् ।
उनले आफुहरुले माधव नेपाललाई अन्तिमसम्म पार्टी नछोड्न अपिल गरेको बताए । नेपाल समूहले पार्टी विभाजन गरेर ठुलो गल्ती गरेको बताउदै पाण्डेले पार्टीमा फर्किए अझै पनि क्षमादान दिइने बताए ।
विभाजनको बाटोले कम्युनिस्ट पार्टीलाई कमजोर पार्ने बताउदै उनले फर्केर गल्ती सच्याउन आग्रह गरे । उनले भने – ‘माधव नेपाललाई अन्तिमसम्म पार्टी नछोड्न अपिल गर्यौं । तर छोडेर जानुभयो’ उनले थपे – ‘हामीले नेपाललाई धोका दिएको होइन, पार्टी फोड्ने धोकेबाज हो । उहाँले हामीलाई धोका दिनुभयो ।’
नेता पाण्डेले २०५४ सालको पार्टी विभाजनले जस्तै अहिलेको विभाजनले पनि पार्टी समस्यामा फस्ने पनि बताए । पार्टी एकता कार्यदलमा सदस्य भएर काम गरेका उनले धेरै प्रयास गर्दा पनि पार्टी मिलाउन नसके र नेताहरुको झगडाले ठूला घटना हुनसक्ने भन्दै नेताहरुले सुधार्नुपर्ने बताए । उनले भने – ‘विदेशी शक्तिले खेलेर विभाजनमा सघायो । विदेशीहरु पनि खेल्छन् । यसपालि पनि खेले’
