नेपाली कांग्रेसको वडा अधिवेसनका क्रममा खोटाङमा जिल्ला स्तरका नेता तथा निर्वाचित जनप्रतिनिधि समेत क्षेत्रीय प्रतिनिधि चयनमा पछि परेका छन् । नेपाली कांग्रेसको आसन्न १४ औं महाधिबेसन अन्तरगत जिल्लाको ७९ वडामा शुक्रबार र शनिबार भएको अधिबेसनका क्रममा मतदान भएका वडामा कतिपय जिल्ला स्तरका नेता तथा निर्वाचित जनप्रतिनिधि क्षेत्रीय प्रतिनिधि चयन हुनबाट छेकिएका हुन् ।
कांग्रेसको उपल्लो पदमा लड्नका लागि वडाबाट क्षेत्रीय प्रतिनिधि अनिवार्य चुनिनुपर्ने भएकाले क्षेत्रीय प्रतिनिधि चयनमा वडा अधिवेसनमा घम्साघम्सी पर्ने गरेको छ । जन्तेढुंगा गाउँपालिकाबाट कांग्रेसका पुर्वमहासमिति सदस्य एवं पुर्व पार्टी सचिव महेन्द्र कट्वाल, कांग्रेसका जिल्ला समिति सदस्य देवराज बस्नेत, पुर्व जिल्ला सदस्य देवेन्द्र बस्नेत, दिप्रुङ चुईचुम्मा गाउँपालिकाबाट जिल्ला सदस्य सरन राई, पुर्व जिल्ला सदस्य पञ्चुकुमार राई, जिल्ला सदस्य ललिता राउत, दिप्रुङ चुईचुम्मा गाउँपालिकाका उपाध्यक्ष सपना राई, केपिलासगढी गाउँपालिका–४ बाक्सिलाका वडाध्यक्ष गणेश अधिकारी, ऐसेलुखर्क गाउँपालिका–२ बाकाचोलका वडा सदस्य जयनन्द तामाङ र नेपाल विद्यार्थी संघका जिल्ला उपाध्यक्ष नइन्द्र राई वडामै छेकिएका हुन् ।
हाल काठ्माण्डौं रहेका कट्वालले क्षेत्रीय प्रतिनिधिको उम्मेद्वारीका लागि आफ्नो प्रतिनिधिमार्फत गाउँपालिकामा वारेस पठाएका थिए । कट्वाल जन्तेढुंगा गाउँपालिका–५ चिसापानीका वडा सदस्य पनि हुन् । दिप्रुङ चुईचुम्मा गाउँपालिकाका उपाध्यक्ष राईले भने चुनावी प्रकृयाकाक्रममा उम्मेद्वारी फिर्ता लिएको कांग्रेसले जनाएको छ ।
