स्पष्ट अल्पमतमा परे पनि बागमती प्रदेशकी मुख्यमन्त्री अष्टलक्ष्मी शाक्य ‘पर्ख र हेर’ को नीतिमा रहनुभएको छ । प्रदेश सरकारको नेतृत्व सम्हालेको एक सातामा अल्पमतमा पर्नुभएकी शाक्य कसरी अगाडि बढ्ने भन्नेबारे ‘पर्ख र हेर’ को अवस्थामा रहजुभएको हो ।
जिल्ला समन्वय समिति मकवानपुरको वार्षिक समीक्षामा शाक्यले आइतबार सञ्चारकर्मीसँग प्रदेशमा आधिकारिकरुपमा दल विभाजन भएपछि मात्र सरकारको आगामी भूमिका तय हुने बताउनुभयो । विपक्षीहरु अविश्वासको प्रस्तावतर्फ अगाडि बढिसकेको बेला मुख्यमन्त्री शाक्यले विपक्षी दलले अविश्वास प्रस्ताव ल्याए त्यसको सामना गर्न फरक भूमिका निर्वाह गरिने बताउनुभयो ।
‘पहिलादेखि सम्बन्ध राम्रो हुँदा विपक्षी दलहरुले अविश्वासको प्रस्ताव ल्याउनुहुन्छ जस्तो त मलाई लाग्दैन । हामीले उहाँहरुको भूमिका पनि हेर्नुपर्ने हुन्छ । दल विभाजनपछि केकस्तो अवस्था आउँछ, त्यहीअनुसार अघि बढ्छौं । छाड्नपर्ने अवस्था आएछ भने छाड्न पनि तयार छौं । प्रतिपक्षको प्रस्तुतिअनुसार आफू अगाडि बढ्ने भन्दै विपक्षी दलका नेतासँगको विगतको सम्बन्धका आधारमा सहमति र सहकार्यको गृहकार्य गरिने उहाँको भनाइ छ ।
उहाँले आफूहरु प्रतिपक्षमा बस्नुपर्ने अवस्था आए सहर्ष स्वीकार गरिने बताउनुभयो । ‘जनताको काममा इमान्दारितासाथ लागेका छौं । जति दिन सरकारको नेतृत्व पाउँछौं, हामी काम गर्छाैं । प्रतिपक्षमा बस्नुपर्ने अवस्था आए सहर्ष स्वीकार गर्छौं,’ उहाँले भन्नुभयो ।
उहाँले हालसम्म प्रदेशमा आधिकारिकरुपमा पार्टी विभाजन भइनसकेको भन्दै आफूले २२ गते कुरेर बसेको बताउनुभयो । ‘केही साथीहरुले एमाले छाडेर नयाँ दल रोजिसक्नु भएको छ । तर, २२ गतेसम्म दल चयनको समय छ । त्यसपछि मात्र एमाले विभाजन भएर हामी अल्पमतमा पर्ने हो,’ उहाँले भन्नुभयो–एमाले आधिकारिकरुपमा विभाजन भएपछि कस्तो परिस्थिति आउँछ, त्यसलाई सामना गरेर अघि बढ्छौं ।
नेकपा एमाले बागमती प्रदेशको संसदीय दलको बैठकमा शाक्यले आफू एमालेमा नै रहेको बताउनुभएको थियो । उहाँले बैठकमा आफ्नो विषयमा भ्रम फैलाउन खोजिएको भन्दै गुनासो पनि गर्नुभएको थियो । एमाले बागमती प्रदेश संसदीय दलका मुख्य सचेतक दीपक निरौलाले भन्नुभयो–पार्टीलाई एकतावद्ध बनाउन हामीले अभियान अगाडि सारेका हौं । सरकार टिकाउने र जनताको पक्षमा लाग्ने कुरामा अनवरत् छौं ।
तर, नेपाली कांग्रेस बागमती प्रदेश संसदीय दलका नेता इन्द्रबहादुर बानियाँले भने मुख्यमन्त्री शाक्य नेतृत्वको सरकारको आयु अब केही दिनमात्र रहेको बताउनुभएको छ । नेता बानियाँले भदौ २ गते गठन भएको मुख्यमन्त्री शाक्य नेतृत्वको सरकार अल्पमतमा परेकाले यो सरकारको आयु अब केही दिनमात्र बाँकी रहेको बताउनुभयो । नेता बानियाँले बागमती प्रदेशमा छिट्टै गठबन्धनको सरकार गठन हुने दाबी गर्नुभयो ।
सरकारको नेतृत्व कांग्रेस, नेकपा (एकीकृत समाजवादी) वा नेकपा माओवादीमध्ये कुनै एक दलले गर्ने कुरा निश्चित रहेकाले गठबन्धनको सहमति र सहकार्यले यसको निर्णय गर्ने उहाँको भनाइ छ । बागमती प्रदेशका १ सय ९ सांसदमध्ये ५६ सांसदसहितको एमालेले बहुमतको सरकार चलाउँदै आएको थियो ।
तर, एमालेबाट निर्वाचित १३ सांसदले नेकपा (एकीकृत समाजवादी) रोजिसकेका छन् । २२ गतेसम्म दल चयनको समय हु“दा हालसम्म प्रदेश सरकार व्यवहारिकरुपमा अल्पमतमा परे पनि कानुनीरुपमा बहुमतमा छ । एमाले साना दलसँग मिलेर बहुमत पु¥याउने प्रयासमा भए पनि सरकार गठनका लागि पर्याप्त मत पुग्दैन ।
२३ गते आधिकारिकरुपमा प्रदेशमा एमाले विभाजन हुने हुँदा ३० दिनभित्र शाक्यले विश्वासको मत लिनुपर्ने हुन्छ । तर, मुख्यमन्त्री शाक्यले विश्वासको मत नपाउने स्पष्ट देखिएको छ । अब उहाँसँग संसदमा विश्वासको मत लिने वा राजीनामा दिने भन्ने दुई विकल्प छन् ।
एमाले विभाजित भएर नेकपा समाजवादीमा गएका सांसदहरुले भने मुख्यमन्त्री शाक्यलाई नयाँ दलमा आउन आग्रह गरेका छन् । समाजवादीकी सांसद् मुनु सिग्देलले शाक्य पहिला माधव नेपाल खेमाको रहेको भन्दै २२ गतेसम्ममा समाजवादीमा आउन शाक्यलाई आग्रह गर्नुभयो ।
‘हामीले नै उहाँलाई मुख्यमन्त्री बनाएका हौं । उहाँलाई प्रदेश सरकारबाट बिदा गर्न मन छैन । एमाले छाडेर समाजवादीमा आउनुभयो भने हाम्रो अभिभावक उहाँको संरक्षण गर्छौं,’ उहाँले भन्नुभयो ।
