काठमाडौँ– नेपाली काँग्रेसको क्रियाशील सदस्यताको विषयलाई लिएर काँग्रेस जिल्ला सभापतिहरु आन्दोलित भएका छन् । मंगलबार पार्टी केन्द्रीय कार्यालय सानेपामा काँग्रेसका जिल्ला सभापतिहरु धर्ना बसेका छन् । क्रियाशील सदस्यता सार्वजनिक हुनुपर्ने भन्दै उनीहरु आन्दोलित भएका हुन् । नुवाकोट सभापति जगदिश्वर नरसिंह केसी, दैलेख सभापति कृष्णकुमार विसी, कार्भे सभापति मधु आचार्यलगायतका जिल्ला सभापतिहरु धर्नामा बसेका हुन् ।
धर्ना बसेका जिल्ला सभापतिहरुलाई सम्बोधन गर्दै केन्द्रीय सदस्य गगन थापाले क्रियाशील सदस्यता छिटो सार्वजनिक गर्न माग गरेका छन् । उनले आफू क्रियाशील सदस्य छु कि छैन भन्ने जान्ने अधिकार सबैलाई भएको बताए । उनले क्रियाशील सदस्यता सार्वजनिक गरेर त्यसमा भएका गल्तिहरु सच्याउनुपर्ने बताए ।
काँग्रेसको १४ औं महाधिवेशनका लागि करिब ९ लाख क्रियाशील सदस्य पुगेका छन् । लामो रस्साकस्सीपछि सोमबार क्रियाशील सदस्यताको विषय टुंग्याइएको थियो । क्रियाशील सदस्यताबारेको प्रतिवेदन सोमबार पार्टी सभापति शेरबहादुर देउवालाई बुझाइएको छ । क्रियाशील सदस्यताकै विषयमा सहमति नहुँदा पाँच पटकसम्म काँग्रेसको महाधिवेशनको मिति तोकेर सारिएको छ ।
यही भदौ १८ गते देशभरका वडाहरुको अधिवेशनको तालिका छ । तर मंगलबारसम्म वडा अधिवेशनका मतदाता रहेका क्रियाशील सदस्यहरुको नामावली सार्वजनिक गरिएको छैन ।
