काठमाडौं- नेकपा एमालेका सांसदहरुले सोमबारको लुम्बिनी प्रदेशसभाको बैठक चल्न दिएनन् । सभामुख पूर्ण बहादुर घर्तीले बैठक शुरु गर्नासाथ एमालेका सांसहरुले उठेर नाराजवाजी गरेका छन् । सभामुख घर्तीले आफूलाई बोल्न दिन एमालेका सांसहरुसँग आग्रह गरे पनि उनीहरुले सभामुखको कुरा सुनेनन्। एमाले सांसदहरुले एमालेले कारबाही गरेका दुईजना प्रदेशसभा सांसदहरु अजय शाही र विमला वलीलाई कारबाही गर्नुपर्ने भन्दै नारावाजीसमेत गरेका छन् ।
एमाले सांसदहरुले सभामुख घर्तीले पदीय मर्यादासमेत कायम नगरेको आरोप लगाएका छन् । एमालेले दुईजना सांसदलाई कारबाही नभएसम्म बैठक चल्न नदिने बताएका छन् ।
अजय शाही सूर्य चुनाव चिन्हबाट विजयी भए पनि उनी हृदेश त्रिपाठीसँगै स्वतन्त्र सांसद हुन् भने वली नेकपाकालिन समयमा सूर्य चुनाव चिन्हबाट विजयी भएकी थिइन् । वलीले माओवादी केन्द्र रोजेकी छन् भने शाही अहिले माओवादी नेतृत्वको सरकारमा मन्त्रीसमेत छ ।
एमालेले आफ्ना पार्टीका दुईजना सांसदले दलीय ह्वीप उल्लंघन गरेको भन्दै पदमुक्त गर्ने निर्णय गर्दै प्रदेश सभामा जानकारी गराएको थियो तर सभामुख घर्तीले उनीहरुलाई कारबाही गर्न नसक्ने जनाएका छन् ।
एमाले सांसदहरुले नारावाजी गरिरँदा माओवादी केन्द्रका सांसद बसन्त मगरले सभामुखसँग समय मागेर बोल्दै वली आफ्नो दलको सांसद भएको भन्दै अन्य दलको सांसदलाई अन्य दलले कारबाही गर्न नमिल्ने बताए । उनी बोल्दैगर्दा एमाले सांसदहरुले झन उत्तेजित भएर नारावाजी गरेका थिए ।
