काठमाडौं । नेकपा एमाले स्थायी समिति सदस्य सत्यनारायण मण्डलले अबको पार्टी माधव नेपालाबिनाको एमाले बन्ने ठोकुवा गरेका छन् । उनले पुष्पकमल दाहाल प्रचण्ड र शेरबहादुर देउवाको पिछलग्गु भएकाले वरिष्ठ नेता नेपाललाई केही दिनभित्रै पार्टीबाट हटाउन सक्ने पनि बताए ।
नेपाली रेडियो नेटवर्कको कार्यक्रम नेपाली बहसका लागि आज बिहान पत्रकार ऋषि धमलालाई अन्तर्वार्ता दिँदै नेता मण्डलले भने, “माधव नेपाल कसैको इसारामा चलेका छन् । आफ्नै घरलाई खरानी बनाउनु कुनै कम्युनिस्ट नैतिकता हो ? त्यसैले माधव नेपाल धरोहर होइन, गद्दार हुन् । उनी होलीवाइनका सूत्रधार हुन् । सनातन धर्ममाथि प्रहार गर्ने मान्छे हुन् । केपी ओली एमालेका मात्र होइन, देशकै सगरमाथा हुन् । केपी ओलीजस्तो नेता नेपालको इतिहासमा कोही जन्मेकोे छैन ।”
अब माधव नेपाललाई पार्टीमा कुनै स्थान नरहने उनले बताए । उनलाई पार्टीमा भित्र्याए या अध्यक्ष पद दिए विद्रोह हुने दाबी गरे । “देउवा र प्रचण्डजस्ता भ्रष्ट नेतालाई अघि बढाउने माधव नेपाल राष्ट्रघाती हुन् । बिहान एउटा पद छोड, दिउँसो अर्को पद छोड, साँझ अर्को पनि छोड भन्ने माधव नेपाल हो को ? उनी स्वर्गका राजा इन्द्र हुन् कि ब्रह्म, विष्णु महेश्वर हुन् ? पार्टीको प्रधानमन्त्रीलाई निष्कासन गर्ने उनको के हैसियत छ ? दुई ठाउँमा हारेर प्रधानमन्त्री बनेका होइनन् ?”
उनले भदौ २७ र २८ गते एमालेको विधान अधिवेशन गरेरै छाड्ने र माधव नेपालले भन्दैमा त्यो नरोकिने दृढता पनि उनले व्यक्त गरे । उनले प्रश्न गरे, “हामीले विधान अधिवेशन गर्न लागेको हो, विधान संशोधन गरिसकेको होइन । माधव नेपाल हो को ? उनले भन्दैमा फिर्ता लिनुपर्छ ? माधव नेपालका दुईचार जना भरौटेले कुरा गर्दैमा जे पनि हुन्छ ? ऋषिजी, तपाईं पनि यो देशको स्थापित पत्रकार हो । जनतालाई दिग्भ्रमित नगर्नूस् ।”
फोटो फाइल बाट
