काठमाडौँ– नेपाल कम्युनिस्ट पार्टी (एमाले) का वरिष्ठ नेता माधवकुमार नेपालले पार्टी एकताका लागि आफूहरु तयार रहेको बताएका छन् ।
बिहीबार आफू पक्षीय केन्द्रीय सदस्यहरुको बैठकमा वरिष्ठ नेता नेपालले पार्टी एकताका लागि आफूहरु तयार रहेको तर सम्मानजनक एकता हुनुपर्ने बताएका हुन् ।
बैठकमा नेता नेपालले एकतालाई जोगाउन अहिलेसम्म भएका प्रयाससँगै अन्तिमसम्म प्रयास एकताको प्रक्रिया र वार्ता अघि बढिरहेको बताए ।
नेपालको भनाइ उदृत गर्दै नेता रघुजी पन्तले भने,‘ एकता हाम्रो चाहना हो, हाम्रो इच्छा हो भन्नुभयो । वार्ता भइरहेको छ भनेर जानकारी गराउनुभयो ।’
बैठकमा वरिष्ठ नेता नेपालले कोरोनाविरुद्धको खोप, दार्चुला घटना लगायतका बारेमा सरकारलाई ध्यानाकर्षण गराएको समेत पन्तले जानकारी दिए ।
यसैगरी बैठकमा उपाध्यक्ष डा भीम रावलले पार्टी एकताका विषयमा आन्तरिक समस्या समाधानका लागि बनेको कार्यदलले गरेको सहमति र प्रयासबारे जानकारी गराएका थिए ।
उनले सदस्यता नवीकरण र वडा तथा नगर कमिटीको अधिवेशन रोक्न माग गरेका छन् । पार्टी एकता कार्यदलको १० बुँदे सहमति अनुसार २ जेठ २०७५ को कमिटी बसेर मात्र अरु प्रक्रिया थाल्नुपर्ने उनले बताए ।
नेता झपटबहादुर रावलले एमालेलाई सुदृढ र सवल कसरी बनाउने भन्ने विषमया नै बैठक केन्द्रित भएको र पार्टी तथा कम्युनिष्ट आन्दोलन कमजोर बनाउनका लागि भइरहेका गतिविधिको कसरी मुकाविला गर्ने भन्ने सम्बन्धमा छलफल केन्द्रित रहेको जानकारी दिए ।
उनले एमालेको नवौँ महाधिवेशनले पारित गरेको राजनीतिक, साङ्गठनिक प्रतिवेदन र विधान अनुसार नै पार्टी अघि बढाउनुपर्ने आफूहरूको महत्वपूर्ण शर्त रहेको उल्लेख गरे । नेतृत्वले पछिल्लो चरणमा गरेका कमीकमजोरीलाई सुधारेर विधानअनुसार नै पार्टी अघि बढ्ने उनले विश्वास व्यक्त गरे ।
केन्द्रीय सदस्य रामकुमारी झाँक्रीले सञ्चारकर्मीहरूसँग संक्षिप्त प्रतिक्रिया दिँदै पार्टीलाई एकताबद्ध बनाउने कुरामा नै बैठक केन्द्रित रहेको तर आत्मसमर्पण गरेर भने एकता नहुने जिकिर गरिन् । यसअघि पार्टीको स्थायी कमिटी बैठकले विधान अधिवेशन, पालिका तथा वडाधिवेशनको मिति तय गरेको थियो ।
बैठकको निर्णय अनुमोदनका लागि यही साउन २४ गते केन्द्रीय कमिटी बैठक बोलाइसकेको अवस्थामा नेपाल पक्षीय केन्द्रीय कमिटीका सदस्यहरूको बैठक बसेको हो ।
बैठकले आफ्नो पक्षको आगामी रणनीति तय गर्ने जनाइएको छ । बैठक बस्नु अघि सोही पक्षीय स्थायी कमिटीका सदस्यहरूको बैठक पनि बसेको थियो ।
आजदेखि शुरु भएको बैठकमा ७० भन्दा बढी सदस्य सहभागी भएको जनाइएको छ । आज केही केन्द्रीय सदस्यहरुले आफ्नो धारणा राखेको र भोलि साढे ११ बजे फेरि बैठक बस्ने नेता पन्तले जानकारी दिए ।
नेता पन्तले एमाले अहिले पनि एकीकृत रुपमै रहेको र एमालेले प्रतिपक्षी दल भएका कारण सरकारमा सहभागी नहुने समेत बताए ।
