नेकपा एमालेकी नेतृ गंगा थारु लेख्नु हुन्छ…
प्रिय कमरेडहरु जनतासंग सुर्यमा भोट माग्नु भयो ,आफुले रुखमा भोट हाल्नु भयो । देउवालाई बिश्वासको मत दिनु भयो , स्व. मनमोहनको आत्मा कति भत्भति जलि रहेको होला? स्वर्गिय मदन भण्डारि,पुष्पालाल श्रेष्ठहरुको आत्मा कति भतभति जलिरहेको होला ? मनमोहन अधिकारी हेलिकप्टर दुर्घटनामा परेर टिचिङ अस्पतालको बेडमा छट्पटाईरहेको बेला, मनमोहनले म बुढो मान्छे, घाईते छु, मलाई एक साता समय दिनुस, म संसदमा उभिएर अविस्वास प्रस्तावको जवाफ दिएर सत्ता हस्तांतरण गर्छु भनेर आग्रह गर्दा समेत तत्कालीन कांग्रेस संसदीय दलका नेता शेरबहादुर देउवाले नमानेपछी घाईते मनमोहनलाई अस्पतालको बेडबाट जवाफ दिन बाध्य पारियो!! आज तिनै देउवालाई बिस्वासको मत !! वा रे वा!! तिम्रो क्रांतिकारीता!! वा रे वा!! हनुमानहरु!! आज देउवा दुनियाँ कै अब्बल क्रान्तिकारी भए!!हैट!! स्वर्गीय मनमोहन,मदन र पुष्पलालहरुको आत्माले धिक्कार्ने छ!! गरिब जनता को आसा अनि बिस्वास र सहिद को रगत ले पोल्ने र श्राप लाग्ने छ।। जनतालाई सुर्यमा भोट हाल्न लगाएर आफुहरुले रुखमा भोट हाल्नेले अब जनतालाइ के जबाफ दिनुहुन्छ कमरेडहरु ? भन्दै प्रश्न गरेकी छन्।
प्रधानमन्त्री शेरबहादुर देउवालाई एमालेका २२ सांसदले विश्वासको मत दिएपछि उनले यस्तो बताएकी हुन्। उनले सामाजिक संजालमा लेखेकी छन्, “जनतालाई सुर्यमा भोट हाल्न लगाएर आफुहरुले रुखमा भोट हाल्नेले अब जनतालाइ के जबाफ दिनुहुन्छ कमरेड हरु?”
देउवाले प्रतिनिधिसभामा १६५ मत पाउँदा नेकपा एमालेका २२ सांसदले मत दिएका हुन् । मत दिनेमा माधव नेपाल पक्ष मात्र नभई अध्यक्ष केपी शर्मा ओली पक्षका सांसद पनि छन् ।
देउवालाई मत दिनमा माधवकुमार नेपाल, विरोध खतिवडा, जीवनराम श्रेष्ठ, कल्याणी खड्का, मेटमणि चौधरी, भवानी खापुङ, मुकुन्द न्यौपाने, पार्वती विशुंखे, हिरा केसी, कृष्णकुमार श्रेष्ठ किसान रहेका छन् ।
त्यस्तै गोपाल बम, प्रेमबहादुर आले, धनबहादुर बुढा, विना बुढाथोकी, सरला यादव, पुष्पाकुमारी कर्ण, लक्ष्मी चौधरी, निरादेवी जैरु, रामकुमारी झाँक्री, कलिला खातुन, सविना हुसेन र कृष्णलाल महर्जनले पनि देउवालाई मत दिएका छन् ।
प्रधानमन्त्री शेरबहादुर देउवाले प्रतिनिधिसभाबाट विश्वासको मत प्राप्त गरेका छन् । देउवाको पक्षमा १६५ मत परेको छ भने विपक्षमा ८३ मत मात्रै परेको छ । १ जना तटस्थ रहे ।
आइतबार राति भएको मतदानमा देउवाले प्रतिनिधि सभाबाट विश्वासको मत प्राप्त गरेका हुन् । सभामुख अग्नि सापकोटाले प्रतिनिधि सभामा भएको मत विभाजनमार्फत भएको मतदानमा देउवाले बहुमत प्राप्त गरेको घोषणा गरेका हुन् ।
प्रधानमन्त्री देउवाको पक्षमा काँग्रेससहित माओवादी केन्द्र, जसपाका दुवै पक्ष र राष्ट्रिय जनमोर्चाका सांसदले मतदान गरेका थिए । त्यस्तै प्रस्तावको विपक्षमा एमालेका सांसदले मतदान गरेका थिए ।
