काठमाडौं । नेकपा एमालेका वरिष्ठ नेता माधव कुमार नेपाल नेता भीम रावललाई भेट्न उनको निवास टोखा पुगेका छन् । स्रोतका अनुसार बुधबार आफूपक्षीय नेताहरुको स्थायी कमिटी बैठकमा रावल नआएपछि नेता नेपाल उनलाई भेट्न निवासमै पुगेका हुन् ।
३ साउनमा प्रधानमन्त्री शेरबहादुर देउवालाई विश्वासको मत दिने वा विपक्षमा मतदान गर्ने भन्नेमा कुरा नमिल्दा रावलले सांसदबाट राजीनामा दिएका थिए । पार्टी एकताको दश बुँदे सहमति जुटाएको कार्यदलमा रावल नेता नेपाल तर्फका संयोजक थिए ।
स्रोतका अनुसार रावल पछिल्लो समय ओली समूह नजिक भएका छन्। जसरी भए पनि पार्टी एकता गर्नुपर्ने माग गरेका रावल पछिल्लो समय नेपालसँग टाढा भएका छन्।
उनी ओली समूहमा जाने तयारी भएको स्रोतले बतायो। नेपाल पनि रावलको पछिल्लो गतिबिधिदेखि असन्तुष्टि भएका छन्।
स्रोतका अनुसार भेटघाटमा नेपालले बैठकमा किन आउनु भएन भन्दै प्रश्न गरे। उत्तरमा रावलले अब बैठकमा सहभागी हुन कुनै काम नभएको बताए। उनले अब आफू सांसद नरहेको र बैठकमा नआउने चेतावनी दिए।
