काठमाडौं । सुनसरीको देवानगञ्जमा भएको हिंसात्मक घटनापछि उत्पन्न अवस्था तथा त्यसपछिका सम्भावित अप्रिय घटनालाई मध्यनजर गर्दै गृहमन्त्री सुदन गुरुङसँग गम्भीर छलफल गरिएको छ। छलफलका क्रममा घटनाको संवेदनशीलता, स्थानीय सुरक्षा अवस्था तथा भविष्यमा यस्ता घटना दोहोरिन नदिन आवश्यक कदमबारे विस्तृत रूपमा ध्यानाकर्षण गराइएको बताइएको छ।
छलफलमा देवानगञ्ज घटनाको पृष्ठभूमि, स्थानीय वस्तुस्थिति तथा सरकारले तत्काल र दीर्घकालीन रूपमा अवलम्बन गर्नुपर्ने नीतिगत निर्णयबारे आवश्यक सुझावहरू पनि गृहमन्त्रीसमक्ष प्रस्तुत गरिएको जनाइएको छ। स्थानीय तहबाट प्राप्त जानकारी र सम्भावित जोखिमका विषयमा समेत मन्त्रीलाई अवगत गराइएको बताइएको छ।
गृहमन्त्री सुदन गुरुङले देवानगञ्ज घटनाबारे आफू पूर्ण रूपमा जानकार रहेको उल्लेख गर्दै भविष्यमा हिन्दु–मुस्लिम समुदायका नाममा कुनै पनि स्थानमा यस्ता घटना दोहोरिन नदिने गरी गृह मन्त्रालयले आवश्यक अनुसन्धान र तयारी गरिरहेको जानकारी दिएका छन्। उनले शान्ति, सुरक्षा र सामाजिक सद्भाव कायम राख्न मन्त्रालय प्रतिबद्ध रहेको पनि बताएका छन्।
मन्त्री गुरुङका अनुसार घटनाको निष्पक्ष छानबिनका लागि उच्चस्तरीय छानबिन समिति गठन गर्ने तयारी भइरहेको छ। साथै, प्रधानमन्त्रीसँग छलफल गरी घटनासँग सम्बन्धित विशेष निर्णय सार्वजनिक गर्ने तयारीसमेत भइरहेको उनले बताएका छन्।
देवानगञ्ज घटनापछि सुरक्षा निकायले प्रभावित क्षेत्रमा निगरानी बढाएको छ भने स्थानीय प्रशासनले पनि शान्ति, सद्भाव र कानुनी शासन कायम राख्न सबै पक्षसँग संयम अपनाउन आग्रह गरेको छ। सरकारले घटनाको सत्यतथ्य बाहिर ल्याई दोषीमाथि कानुनी कारबाही र भविष्यमा यस्ता घटना दोहोरिन नदिने गरी आवश्यक नीतिगत निर्णय लिने अपेक्षा गरिएको छ।
