काठमाडौं । राष्ट्रिय स्वतन्त्र पार्टीले सार्वजनिक प्रशासनलाई राजनीतिक हस्तक्षेपबाट मुक्त, व्यावसायिक र जनउत्तरदायी बनाउनुपर्ने आफ्नो स्थापनाकालदेखिको धारणा पुनः स्पष्ट पारेको छ। हालै सम्पन्न आम निर्वाचनको सन्दर्भमा समेत निजामती सेवालाई तटस्थ, निष्पक्ष र सक्षम बनाउँदै सार्वजनिक सेवा प्रवाहलाई प्रभावकारी बनाउने प्रतिबद्धता दोहोर्याइएको छ। पार्टीले यस क्षेत्रको सुधारका लागि विभिन्न योजनासहितको धारणा सार्वजनिक गरेको जनाएको छ।
विज्ञप्तिमा पछिल्लो समय निजामती सेवाभित्र विभिन्न समूह, अभियान वा युनियन शैलीका संरचनामार्फत पार्टी र नेतृत्वको नाम जोड्दै भ्रम सिर्जना गर्ने प्रयास भएकोप्रति गम्भीर ध्यानाकर्षण भएको उल्लेख छ। यस्ता गतिविधिमा पार्टीको कुनै संलग्नता, समर्थन वा सहमति नरहेको स्पष्ट पार्दै कसैले आफ्नो स्वार्थ पूर्तिका लागि नाम दुरुपयोग गरे त्यसप्रति सचेत रहन कर्मचारी र सरोकारवालालाई अपिल गरिएको छ।
पार्टीले कर्मचारीको मुख्य धर्म जनसेवा र पहिचान व्यावसायिकता भएको उल्लेख गर्दै प्रशासनिक संयन्त्रलाई कुनै पनि राजनीतिक प्रभावबाट मुक्त राख्नुपर्नेमा जोड दिएको छ। मेरिटोक्रेसी (योग्यता प्रणाली) का आधारमा निजामती सेवा सञ्चालन हुनुपर्ने धारणा राख्दै कर्मचारीहरू राज्य र जनताप्रति मात्र उत्तरदायी हुनुपर्ने बताइएको छ। साथै, सम्पूर्ण राष्ट्रसेवक कर्मचारीलाई निष्पक्ष, जिम्मेवार र समर्पित भएर जनताको सेवामा लाग्न आह्वान गरिएको छ।
