काठमाडौं। प्रधानमन्त्री बालेन्द्र शाह नेतृत्वको मन्त्रिपरिषद्ले मुलुकको सुशासन, पारदर्शिता र उत्तरदायित्वलाई केन्द्रमा राख्दै महत्वपूर्ण चार निर्णय सार्वजनिक गरेको छ। सरकारको पछिल्लो बैठकले शहीदप्रति सम्मानदेखि प्रशासनिक सुधारसम्मका विषयलाई प्राथमिकताका साथ अघि बढाएको हो।
बैठकको पहिलो निर्णयअनुसार देशका लागि प्राण त्याग गर्ने सम्पूर्ण शहीदहरूप्रति उच्च सम्मान र श्रद्धाञ्जली व्यक्त गरिएको छ। सरकारले शहीदहरूको योगदानलाई स्मरण गर्दै उनीहरूको सपना अनुरूप समृद्ध राष्ट्र निर्माणमा प्रतिबद्धता व्यक्त गरेको छ।
त्यस्तै, सरकारको प्रवक्ताको जिम्मेवारी शिक्षा मन्त्रीलाई प्रदान गर्ने निर्णय गरिएको छ। यस निर्णयसँगै सरकारका नीति, कार्यक्रम तथा गतिविधिहरूलाई जनतासामु प्रभावकारी रूपमा प्रस्तुत गर्ने अपेक्षा गरिएको छ।
यसैगरी, सुशासन प्रवर्द्धनका लागि १०० वटा विशेष कार्ययोजना स्वीकृत गरिएको छ भने जाँचबुझ आयोगको प्रतिवेदन तत्काल कार्यान्वयन गर्ने निर्णय समेत गरिएको छ। यी निर्णयहरूले सरकारी कार्यशैलीमा सुधार ल्याउने, पारदर्शिता बढाउने र जनविश्वास सुदृढ गर्ने सरकारको लक्ष्य स्पष्ट पारेको छ।
