काठमाडाैँ । वैशाख १० गते सम्पन्न उपनिर्वाचनबाट राष्ट्रिय स्वतन्त्र पार्टी (रास्वपा) ले एक सिट बोनस पाएको छ । प्रतिनिधिसभामा २० सिट भएको रास्वपाको अब २१ सिट हुने भएको छ ।
चितवन क्षेत्र नम्बर २ बाट गत मंसिर ४ गतेको निर्वाचनमा लामिछाने भारी मतका साथ विजयी भएपनि नागरिकता विवादमा दोषी ठहर भएपछि उनको पद गुमेको थियो ।
पद गुमेपनि लामिछानेले अदालतको आदेशअनुसार आफ्नो पुरानो नागरिकता कायम गरेसँगै उनलाई उम्मेदवार हुने बाटो खुल्यो । सोहीअनुसार चितवन २ बाटै उम्मेदवारी लिएका लामिछानेले यो उपनिर्वाचन ‘एकको बदला तीन’ सार्वजनिक रुपमा बताउँदै आएका थिए ।
जसअनुसार तनहुँ १ बाट स्वर्णिम वाग्ले र बारा २ बाट रमेश खरेललाई पार्टीको तर्फबाट लडाइएकामा तनहुँको नतिजा पनि रास्वपाकै पक्षमा आएको छ । तनहुँमा स्वर्णिम वाग्ले विजयी हुँदा चितवन दुईमा यसअघिको भन्दा पनि धेरै मत पाएर लामिछाने विजयी भए ।
तर, बारा २ मा भने रास्वपा पराजित हुने निश्चित देखिएको छ । रास्वपाका उम्मेदवार खरेल जारी मतगणनामा कमजोर मतका साथ चौथो स्थानमा छन् ।
रास्वपा र सो पार्टीका सभापति रविले नागरिकता विवादमा आफ्नो एक पद गुमेपनि त्यसको बदलमा तीन ल्याउने आशयका साथ ‘एकको बदला तीन सिट’ जित्ने बताउँदै आएका थिए । तर, सो योजना पुरा नहुने भएपनि रास्वपाले संसदमा एक सिट बोनस भने उपनिर्वाचनबाट पाएको छ ।
तनहुँ १ मा मंसिर ४ मा निर्वाचन रामचन्द्र पौडेल राष्ट्रपति र बारा २ मा रामसहाय प्रसाद यादव उपराष्ट्रपति बनेपछि उपनिर्वाचन भएको हो ।
