काठमाडौं । प्रदेशसभा सचिवालयमा आज दिउँसो २ बजे एक सय नौ जना प्रदेशसभा सदस्यको शपथग्रहण हुन लागेको हो । आज प्रदेशसभा सदस्यहरुलाई बागमती प्रदेशसभाका जेष्ठ सदस्य ७२ वर्षीय रामप्रसाद ढुंगानाले शपथग्रहण गराउनु हुने छ ।
हिजो ढुंगानाले प्रदेश प्रमुख यादवचन्द्र शर्मासमक्ष शपथग्रहण गरेलगतै आज अरु प्रदेशसभा सदस्यहरुले पनि सपथग्रहण गर्ने कार्यतालिका तय भएको हो । आजको सपथग्रहणका लागि सबै तयारी पुरा भएको प्रदेशसभा सचिवालयका सचिव कृष्णहरि खड्काले बताउनुभयो ।
७२ वर्षीय ढुंगानाले बागमती प्रदेशसभाले सभामुख चयन नगरेसम्मको लागि प्रदेशसभाको अध्यक्षता ग्रहण गर्नु हुनेछ । ढुङ्गाना २००६ असोज २ गते जन्मनु भएको थियो । नुवाकोट क्षेत्र नम्बर २ को क बाट ढुंगाना विजयी हुनु भएको हो ।
