काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डलाई प्रधानमन्त्रीमा समर्थन गरेको राष्ट्रिय प्रजातन्त्र पार्टी (राप्रपा) र नागरिक उन्मुक्ति पार्टी (नाउपा) सरकारमा नजाने भएको छ । १४ सांसद रहेको राप्रपा र ४ सांसद रहेको नाउपाले सरकारलाई बाहिरबाट समर्थन गर्ने, तर सत्तामा नजाने बताएका छन् । दुवै दललाई समेत जोडेर प्रचण्डले १६९ सांसदको समर्थन रहेको भनि राष्ट्रपति कार्यालयमा दाबी पेश गरेका थिए ।
राप्रपा र नाउपाले सरकारलाई समर्थन गरेर पनि सरकारमा नजाने नीति लिइरहँदा जसपा के गर्ने भन्ने निर्णयमा पुगेको छैन् । नेताहरुका अनुसार जसपा ‘पर्ख र हेर’को नीतिमा छ । सरकारमा जाने दलहरुले आफ्ना मन्त्री पनि पठाइसके । तार, जसपा भने समर्थन दिइसकेर पनि मन्त्री पठाउने दोधारमा छ । यसबारे निर्णयका लागि हतार गर्न आवश्यक नरहेको उनले अध्यक्ष उपेन्द्र यादवले तर्क गरे ।
यादवले यसो भन्दैगर्दा जसपाका संघीय परिषद् अध्यक्ष अशोक राईले भने सरकारमा पार्टीको तर्फबाट नेतृत्व गर्ने चाहना लुकाएनन् । यादवले केही दिनमा राजनीतिक समितिको बैठक बसेर मात्रै यसबारेमा के गर्ने भन्ने निर्णय लिने बताएका छन् । प्रतिनिधिसभामा जसपाको १२ सिट छ । जसपाले मधेस प्रदेश सरकारको नेतृत्व आफूले पाउनुपर्ने दाबी गरेको छ । यसअघिको चुनावमा जसपा एमालेसँग तालमेलमा थियो ।
