काठमाडौं । नेपाल कम्युनिष्ट पार्टी (माओवादी केन्द्र)ले सांसदहरूको हस्ताक्षर संकलन गरेको छ । माओवादी केन्द्रका एक सांसदका अनुसार पुस ७ मा बसेको संसदीय दलको बैठकमा सांसदहरूलाई प्रधानमन्त्रीमा दाबी प्रस्तुत गर्ने क्रममा पेस गर्नका लागि हस्ताक्षर संकलन गरिएको हो ।
सांसदहरूलाई प्रधानमन्त्रीमा दाबी लगायत विभिन्न काममा प्रयोग गर्नका लागि भनेर संसदीय दलको बैठकमा हस्ताक्षर संकलन गरिएको बताइएको छ । उक्त बैठकमा अनुपस्थित सांसदहरूको शनिबार बिहानसम्म हस्ताक्षर लिइसकिएको बताइएको छ । हस्ताक्षर संकलन कार्यमा संलग्न एक सांसदले सबै सांसदहरूको हस्ताक्षर लिइसकिएको छ ।
माओवादी केन्द्रका अध्यक्ष प्रचण्डले गठबन्धनबाट पहिलो कार्यकाल प्रधानमन्त्री आफू बन्नुपर्ने दाबी गरिरहेका छन् । कांग्रेस सभापति तथा प्रधानमन्त्री शेरबहादुर देउवाले पनि आफू नै प्रधानमन्त्रीमा निरन्तर रहन चाहेका छन् ।
दुवै नेताबीच शुक्रबार बेलुका छलफल भएको थियो । देउवा, प्रचण्ड र एकीकृत समाजवादीका अध्यक्ष माधवकुमार नेपाललगायत गठबन्धनका नेताहरूबीच शनिबार पनि बैठक बस्न लागेको छ ।
राष्ट्रपति विद्यादेवी भण्डारीले आइतबार ५ बजेसम्म संविधानको धारा ७६ को उपधारा २ अन्तर्गत दुई वा दुईभन्दा बढी दलहरूको समर्थनमा प्रधानमन्त्रीमा दाबी गर्न आह्वान गरिसकेकी छन् ।
निर्वाचन सम्पन्न भएपश्चात नयाँ सरकार गठनका लागि राष्ट्रपति विद्या भण्डारीले दिएको एक साताको समय सकिन एक दिन बाँकी छ । दलहरूबीच सरकार गठनका लागि शक्ति बाँडफाँडमा सहमति भने जुट्न सकेको छैन ।
राष्ट्रपति, प्रधानमन्त्री, सभामुख लगायतका महत्वपूर्ण पदहरुको गठबन्धन दलहरूबीच भागवण्डा मिल्न नसक्दा सरकार गठन प्रक्रिया अघि बढ्न नसकेको हो ।
