विराटनगर । विराटनगरस्थित महेन्द्र मोरङ क्याम्पसका कांग्रेस नेता शेखर कोइराला निकट केही विद्यार्थी नेताहरूले स्ववियु निर्वाचन समितिको कार्यालयमा निर्वाचन अधिकृत डा. सुशीलकुमार अधिकारीलाई बुधबार मध्यान्ह बजे कोठामै थुनेर आगो लगाए । अधिकारीलाई कोठामा थुनेर विद्यार्थीहरूले बाहिरबाट तालाबन्दी गरे । त्यसको केही समयपछि प्रहरीको टोली पुगेर ताला फोडेर अधिकारीको उद्धार गर्यो ।
प्रहरीले आगजनी गर्ने चार जना विद्यार्थी नेतालाई पक्राउ गरेको छ । पक्राउ पर्नेमा नेविसंघका केन्द्रीय सदस्य योजराज दाहाल, पूजा विश्वास, जिल्ला सचिव गुड्डु साह र आयुष दाहाल रहेका छन् । उनीहरूलाई जिल्ला प्रहरी कार्यालय मोरङको हिरासतमा राखिएको छ ।
प्रहरीले उनीहरूलाई विराटनगरस्थित मुनालपथ नजिकबाट पक्राउ गरेको मोरङ प्रहरीका प्रवक्ता डिएसपी वेदप्रकाश जोशीले जानकारी दिए । ‘क्याम्पस भित्रको निर्वाचन कार्यालयमा आगजनी गर्ने र निर्वाचन अधिकृतलाई थुन्ने समूहलाई हामीले नियन्त्रणमा लिएका छौँ । अहिले मोरङ प्रहरीमा ल्याएर घटनाको अनुसन्धान भइरहेको छ,’ डिएसपी जोशीले भने ।
उनीहरूले आगजनी गर्नु र निर्वाचन अधिकृतलाई थुन्नुको कारण भने नेविसंघको आधिकारिकताको विवाद हो । काँग्रेस निकट नेविसंघमा पार्टी सभापति शेरबहादुर देउवा समूह र डाक्टर शेखर कोइराला समूह छन् । महेन्द्र मोरङ क्याम्पसमा स्ववियु निर्वाचनको लागि दुईवटा नेविसंघ दर्ता भएका थिए । तर, निर्वाचन समितिले मंगलबार राति केन्द्रले दिएको आधिकारिताको चिठी लिएर गएपछि देउवा पक्षबाट उम्मेदवार बनेका प्रज्वल विष्टको समूहलाई नै आधिकारिक मान्दै चुनावी समूहको नाम सार्वजनिक गर्यो । जसमा कोइराला समूहबाट उम्मेदवार बनेका नेविसंघका केन्द्रीय सदस्यसमेत योगराज दाहालको समूहलाई स्वतन्त्र प्यानलको मान्यता दिइयो । त्यसपछि आक्रोशित बनेका उनीहरूले निर्वाचन अधिकृत अधिकारीलाई थुन्ने र निर्वाचन कार्यालयमा आगो लगाउने काम गरेका हुन् ।
नेविसंघको दुई गुटको अराजकता यसअघि पनि देखिँदै आएको थियो । गत फागुन १५ गते नेविसंघको संस्थापन गुटले शेखर गुटका विद्यार्थी नेताहरूमाथि हातहतियारसहित आक्रमण गरेका थिए । नेविसंघका नेता समेत रहेका क्याम्पसका स्ववियु सभापति जसवन्त पौडेल, सचिव सनिम ठकुरी र नेविसंघकै सदस्यहरू महमद सलमानलगायतले नेविसंघ मोरङका सभापति सरोज पोखरेललाई आक्रमण गरेका थिए ।
हाफ ज्याकेटको भित्री गोजीमा राखेको छोटो बिँड भएको वञ्चरो निकालेर त्यहाँ पुगेका सभापति पौडेलसहितले सरोजलाई घाइते हुने गरी आक्रमण गरेका थिए । त्यसबेला पोखरेलसहित र चुले भाइ भनिने आयुष दाहाल, गुड्डु साह, पूजा विश्वास, प्रशान्त यादव र सुविक्षा थापा मगर घाइते भएका थिए ।
यसरी झगडा हुनुमा त्यहाँ कुनै कारण थिएन । नेपाल विद्यार्थी संघकै शेखर कोइराला समूह क्याम्पस इकाई गठन गर्न त्यहाँ पुगेको थियो । उनीहरूले आफ्नो समूहबाहेकलाई त्यहाँ इकाई कमिटी बनाउन नदिने तयारीमा थिए । त्रिभुवन विश्वविद्यालयले स्ववियुको निर्वाचन आगामी चैत ५ गतेका लागि तोकेको छ ।
क्याम्पसका विद्यार्थीको भनाइ अनुसार कोइराला पक्षका नेता तथा पूर्वमुख्यमन्त्री केदार कार्की र कांग्रेस मोरङ उपसभापति तथा विराटनगर महानगर प्रमुख नागेश कोइराला दुई समूहमा बाँडिएकाले विद्यार्थीबिच विवाद झनै बढेको हो । ‘यो क्याम्पसमा नेविसंघले यसअघि पनि बहुमत जितेको हो । अहिले पनि बहुमत जिताएर बिदा हुन चाहन्छु,’ स्ववियु सभापति पौडेलले भने, ‘तर, यहाँ पूर्व मुख्यमन्त्रीहरूले अनावश्यक हस्तक्षेप र चलखेल गरेर नेविसंघलाई हराउन खोजिरहनु भएको छ । मुख्यमन्त्री भइसकेको व्यक्तिले कलेजमा डिस्टर्ब गर्ने काम भइरहेको छ ।’ उनले पूर्व मुख्यमन्त्री कार्कीलाई लक्षित गर्दै भने, ‘यस्तो काम नहोस् म उहाँलाई चेतावनी दिन चाहन्छु ।’
क्याम्पस प्रशासनले भने निर्वाचन प्रक्रियालाई सुरक्षित र निष्पक्ष बनाउन आवश्यक सुरक्षा व्यवस्था मिलाउने प्रतिबद्धता जनाएको छ । विद्यार्थी संगठनहरूबिच बढ्दो तनावलाई मध्यनजर गर्दै क्याम्पस प्रशासनले सबै विद्यार्थी संगठनहरूलाई संयमित हुन र लोकतान्त्रिक प्रक्रियाको सम्मान गर्न आग्रह गरेको छ । प्रहरी प्रशासनले पनि क्याम्पस क्षेत्रमा सुरक्षा व्यवस्था कडा बनाएको छ । उक्त क्याम्पसमा विभिन्न १९ वटा समूहले स्ववियु निर्वाचनमा भाग लिँदैछन् । क्याम्पसमा ५ हजार ५ सय जना मतदाता विद्यार्थी रहेका छन् ।
अखिल क्रान्तिकारीको विरोधयसैबीच अखिल क्रान्तिकारी महेन्द्र मोरङ क्याम्पस कमिटीले महेन्द्र मोरङ क्याम्पसको निर्वाचन समितिको कार्यालयमा भएको आगजनीको घटनाप्रति विरोध जनाएको छ । बुधबार पत्रकार सम्मेलन गर्दै क्रान्तिकारीका प्रतिनिधिहरूले घटना गैरकानुनी र निन्दनीय भएको बताएका हुन् ।
‘क्याम्पस भित्र आगजनी र निर्वाचन अधिकारीलाई कोठामा थुन्नु यो गैरकानुनी हर्कत हो । हामी आजको यस प्रकारको घटनाको घोर निन्दा र भर्त्सना गर्दछौँ,’ स्ववियु सभापतिका उम्मेदवार समेत रहेका अखिल क्रान्तिकारी क्याम्पस इकाई अध्यक्ष रोहित यादवले भने । निर्वाचन कार्यालयमा भएको आगजनीले क्याम्पसमा तनावपूर्ण वातावरण सिर्जना गरेको र शान्तिपूर्ण निर्वाचन हुनेमा चिन्ता बढाएको यादवले बताए । उनले अखिल क्रान्तिकारी महेन्द्र मोरङ क्याम्पसमा एक्लै प्रतिस्पर्धा गर्न लागिरहेको बताए । क्रान्तिकारीले सभापतिमा रोहित यादव, सचिवमा आयुद्ध आछामी र कोषाध्यक्षमा राजिव यादव उम्मेदवार बनाएको छ । यस्तै सदस्यहरूमा गौतम मण्डल, सुजित यादव, रत्ना राजवंशी, आयुष कार्की, युनिष पाण्डे, प्राश्रा श्रेष्ठ र भुमेश्वर साह छन् ।
स्ववियु कै आडमा कलेजमा एकपछि अर्को गुण्डागर्दी भइरहेको अखिल क्रान्तिकारीका केन्द्रीय उपाध्यक्ष अभिमन्यु यादव बताउँछन् । ‘क्याम्पसमा गुण्डागर्दी बढेको छ । नेविसंघले स्ववियुको आडमा त्यस्तो गरिरहेको छ । यसलाई रोक्न आवश्यक छ,’ यादवले भने ।
