काठमाडौं । नेपाली कांग्रेसका सांसद दुर्लभ थापाले भक्तपुरमा विकास अड्किएको बताएका छन् । सूर्यविनायक नगरपालिकाको प्रशासकीय भवन उद्घाटन समारोहलाई सम्बोधन गर्दै उनले प्रधानमन्त्री केपी शर्मा ओलीलाई अगाडि राखेर भने, भक्तपुरमा विकास किन अड्क्यो?
उनले भने, ‘देशको अर्थतन्त्रबारे प्रधानमन्त्री पनि जानकार नै हुनुहुन्छ, तर पछिल्लो समय भक्तपुरमा विकास हरायो, प्रधानमन्त्री यही हुनुहुन्छ, विकासको प्रक्रिया कहाँ अड्कियो ? प्रधानमन्त्रीलाई प्रश्न गर्छु, भक्तपुरको विकास तपाईंले कहाँ अड्काउनुभो ? कुनै राजनीतिक दलको लागि मात्रै विकास निर्माण अड्किएको हो भने आजैदेखि भन्छु, विकास निर्माणको काम सरकारको नेतृत्व गरेको दलले लिने कि नलिने ?’
सांस्द थापाले अहिले कांग्रेस र एमाले एउटै सरकारमा भएकाले विकास निर्माणको गाँठो फुकाउनुपर्नेमा जोड दिए ।
उनले एमाले नेता महेश बस्नेतलाई लक्षित गर्दै भक्तपुरमा आफ्नै खल्तीबाट रकम हालेर काम गरे जस्तो गरेर प्रचार नगर्न आग्रह गरे ।
नेपाली कांग्रेस भक्तपुरका जिल्ला सभापतिसमेत रहेको सांसद थापाले विगतमा प्रतिस्पर्धा भए पनि विकास निर्माणको लागि सहकार्य गर्न तयार रहेको बताए ।
